క్రికెటర్ నితీష్ రాణా భార్యకు వేధింపులు

న్యూఢిల్లీ: క్రికెటర్ నితీష్ రాణా భార్యను శుక్రవారం ఢిల్లీలో ఇద్దరు వ్యక్తులు వెంబడించి వేధించినట్లు పోలీసులు తెలిపారు. ఢిల్లీ పోలీసులు కేసు నమోదు చేసి నిందితుల్లో ఒకరిని అరెస్ట్ చేశారు. పోలీసులు తెలిపిన వివరాల ప్రకారం రాణా భార్య, సాచి మార్వా ఢిల్లీలోని కీర్తి నగర్‌ నుండి ఇంటికి వెళుతుండగా, ఇద్దరు వ్యక్తులు ఆమెను ద్విచక్ర వాహనంపై వెంబడించి, ఆమె ప్రయాణిస్తున్న వాహనం పక్కనే వచ్చి కారును ఢీకొట్టడం ప్రారంభించారు. మార్వా తన ఫోన్‌లో వారు చేస్తున్న పనులను బంధించి, ఇద్దరు వ్యక్తుల చిత్రాలను తన సోషల్ మీడియా హ్యాండిల్‌లో పోస్ట్ చేశారు. అయితే ఢిల్లీ పోలీసులు మొదట ఆమె ఫిర్యాదును పెద్దగా పట్టించుకోలేదు. కనీసం కేసు నమోదు చేయలేదని ఆమె తెలిపారు. సురక్షితంగా ఇంటికి వెళ్లారు కదా.. ఈ విషయాన్ని వదిలేయండని తనతో చెప్పారని ఆమె ఆరోపించారు.

మార్వా ఆర్కిటెక్చరల్ డిజైనర్. ఇండియన్ ప్రీమియర్ లీగ్ (IPL) లో క్రికెటర్ నితీష్ కోల్‌కతా నైట్ రైడర్స్ (KKR) కు ప్రాతినిధ్యం వహిస్తున్నాడు. ఆమె తన ఉద్యోగాన్ని చూసుకుని ఇంటికి వస్తూ ఉండగా వేధింపులు ఎదురయ్యాయి.