కరోనాపై శాస్త్రవేత్తల పరిశోధన.. వెలుగు చూసిన నమ్మలేని నిజాలు..!

• పరిశోధనలలో సంచలన నిజాలు

• గబ్బిలాల నుంచే కరోనా వైరస్‌

కరోనా.. ఈ పేరు వింటేనే ప్రపంచం మొత్తం వణికిపోతుంది. చైనాలో పుట్టిన ఈ వైరస్‌ ప్రపంచ వ్యాప్తంగా ఇప్పటి వరకు 200 దేశాల వరకు పాకింది. 2019లో వైరస్‌ పుట్టిందని తెలియగానే ఇప్పటి వరకూ దానిపై 200పైగా పరిశోధనా పత్రాలు విడుదలయ్యాయి. అసలు ఈ కరోనా వైరస్‌ ఎక్కడి నుంచి వచ్చిందనే దానిపై ఎన్నో కారణాలు బయటకు వస్తున్నాయి. ఈ వైరస్‌పై రకరకాల కారణాలు చెప్పుకొంటున్నారు. ముఖ్యంగా గబ్బిలాల నుంచీ వచ్చిందని కొందరు చెబుతుంటే, జంతువులు, పాముల నుంచీ వచ్చిందని మరి కొందరు చెప్పుకొంటున్నారు.

అయితే ఈ వైరస్‌ గురించి అధిక మంది చెప్పిందేమిటంటే.. చైనా వుహాన్‌ నగరంలోని హుబే ప్రావిన్స్‌ లోని ఓ అడవిలో ఉన్న గుహలో ఉండే గబ్బిలాలపై ఈ వైరస్‌ ఉందనీ, ఆ గబ్బిలాలను తిన్న పాములకు ఈ వైరస్‌ సోకిందనీ, ఆ పాములను సరిగ్గా వండకుండా తినడం వల్ల మనుషులకు వ్యాపించిందనే వాదన ఇప్పుడు తెరపైకి వస్తోంది. అయితే దీని గురించి ఖచ్చితమైన ఆధారాలు మాత్రం లేవు.

మొదటి సారిగా 41 మందికి వైరస్‌..

2019 డిసెంబర్‌లో మొదటి సారిగా 41 మందికి ఈ వైరస్‌ సోకింది. వారిలో 27 మంది వుహాన్‌, హుబే ప్రావిన్స్‌ లోని ఓ మార్కెట్‌కు వెళ్లి పాములు, చేపలు కొనుక్కున్నారు. కాగా, కరోనా వైరస్‌ జీన్‌పై మాలిక్యూలర్‌ జీనోమిక్‌ పరిశోధన చేయగా నమ్మలేని నిజాలు బయటకు వచ్చాయి. ఈ వైరస్‌ 2019 నవంబర్‌లో పుట్టినట్లు తేలింది. ఇది 2002లో వచ్చిన సార్స్‌ వైరస్‌ లక్షణాలకు దగ్గరగా ఉన్నట్లు గుర్తించారు. ఈ సార్స్‌ వైరస్‌ చైనాలోని గ్వాండాంగ్‌ ప్రావిన్స్‌ లో వచ్చి, 2003 నాటికి 29 దేశాల్లో విస్తరించింది. మొత్తం 8వేల 98 కేసులు నమోదు కాగా, 774 మంది మృతి చెందారు. ఈ వైరస్‌ కూడా గుహలోనే పుట్టినట్లు తెలిసింది. అది కూడా గబ్బిలాల నుంచే మనుషులకు వ్యాపించింది. పరిశోధకులు గుర్తించినట్లు తెలుస్తోంది.

రెండు రకాల వైరస్‌లు కలిసి..

ఇకపోతే సార్స్‌-కరోనా వైరస్‌-1, సార్స్‌ -కరోనా వైరస్‌-2 అనే రెండు రకాల వైరస్‌లు కలిసి ఈ కొత్త వైరస్‌ పుట్టుకొచ్చిందని పరిశోధకులు చెబుతున్నారు. అయితే సార్స్‌ -కరోనా వైరస్‌ 1 అనేది గబ్బిలాలపై ఉంటే, సార్స్‌ -కరోనా వైరస్‌ 2 అనేది మలేషియాలోని ప్యాంగోలిన్లపై ఉన్నట్లు పరిశోధకులు గుర్తించారు. అందువల్ల కేవలం గబ్బిలాలు కానీ, కేవలం ప్యాంగోలిన్లు కానీ, కరోనా వైరస్‌ సోకడానికి పూర్తి కారణమై ఉంటుందని శాస్త్రవేత్తలు చెబుతున్నమాట. ఈ రెండు జీవులపై ఉండే రెండు వైరస్‌లు కలవడం వల్ల పుట్టిన కొత్త వైరసే కరోనా వైరస్‌ (కొవిడ్‌-19) కావచ్చని పరిశోధకులు అభిప్రాయపడుతున్నారు.

కాగా, రెండు వైరస్‌లు కలిసి ఒకే వైరస్‌గా ఎలా ఏర్పడుతుందన్నది చాలా మంది శాస్త్రవేత్తలు వేస్తున్న ప్రశ్న. జన్యుపరిణామం క్రమంలో భాగంగా ఇలా జరిగి ఉండవచ్చని చెబుతున్నారు. మొత్తం మీద ఏ రాయి అయితేనేం తల పగలగొట్టుకోవడానికి అన్నట్లు.. ఏ వైరస్‌లు అయితేనేం ఓ మొండి వైరస్‌ తయారై ఇప్పుడు మన ప్రాణాలు తీస్తోంది. మొత్తం మీద పక్కా ఆధారాలు లేకున్నా.. శాస్త్రవేత్తలు జరిపిన పరిశోధనలలో ఈ విషయాలు బయట పడినట్లు తెలుస్తోంది. మరి మున్ముందు ఇంకా ఎలాంటి విషయాలు బయటకు వస్తాయో చూడాలి.