బీఆర్‌ఎస్‌ ప్రచార వ్యూహం.. ప్రతి 100 మంది ఓటర్లకు ఒక ఇన్‌ఛార్జ్‌

త్వరలోనే తెలంగాణ అసెంబ్లీ ఎన్నికలు జరగనున్నాయి. ఈ నేపథ్యంలోనే అసెంబ్లీ ఎన్నికల సన్నాహాల్లో భాగంగా.. అధికార భారత రాష్ట్ర సమితి ధీటుగా అడుగులు వేస్తూ, రాజకీయ రంగంలో సన్నద్ధమైన పోటీదారుగా ఉండేందుకు ప్రయత్నిస్తోంది. 119 మంది అభ్యర్థుల్లో 115 మందితో తొలి జాబితాను ప్రకటించిన పార్టీ అధ్యక్షుడు, ముఖ్యమంత్రి కేసీఆర్‌.. ఇప్పుడు పార్టీ అభ్యర్థులకు భారీ మెజారిటీ వచ్చేలా స్థూల, సూక్ష్మ స్థాయిలో బహుముఖ పోల్ మేనేజ్‌మెంట్‌లో నిమగ్నమయ్యారు. 100 రోజుల కంటే ముందుగానే విస్తృతమైన మొదటి జాబితాను ప్రకటించడంతో బీఆర్‌ఎస్‌ అధ్యక్షుడు ఖచ్చితమైన ప్రణాళిక, వ్యూహంతో కూడిన ఎన్నికల ప్రచారానికి వేదికను సిద్ధం చేశారని తెలుస్తోంది. రాబోయే ఎన్నికల్లో బలమైన ప్రాతినిథ్యం కల్పించేందుకు పార్టీ నిబద్ధతను ప్రతిబింబిస్తూ, అన్ని అంశాలను పరిగణనలోకి తీసుకుని విస్తృతంగా మేధోమథనం చేసి ఈ అభ్యర్థులను ఎంపిక చేశారని ఆ పార్టీ వర్గాలు అంటున్నాయి.

అంతర్గత అసమ్మతిని తగ్గించి, పార్టీలో ఐక్యతను పెంపొందించే ప్రయత్నంలో, ఇప్పటికే విశ్వప్రయత్నాలు జరుగుతున్నాయని, అదే సమయంలో అక్టోబర్‌లో అంచనా వేయబడిన ఎన్నికల షెడ్యూల్‌ను అధికారికంగా ప్రకటించే ముందు రాష్ట్రంలోని ప్రతి ఇంటికి కనీసం రెండుసార్లు చేరుకోవడానికి బీఆర్‌ఎస్‌ నాయకత్వం విస్తృత ప్రచార వ్యూహాన్ని రూపొందించిందని సమాచారం. ఈ ప్రచార వ్యూహానికి పార్టీ బహుముఖ విధానాన్ని అవలంబించిందని వర్గాలు తెలిపాయి. ప్రతి 100 మంది ఓటర్లకు ఒక వ్యక్తి ఇన్‌ఛార్జ్‌ని నియమించారు. నియమించబడిన ఇన్‌ఛార్జ్‌.. ఓటరును సంప్రదించడానికి, గత తొమ్మిదేళ్లలో ప్రభుత్వం సాధించిన విజయాలను వివరించడానికి బాధ్యత వహిస్తారు. ఈ ఇన్‌ఛార్జ్‌లు బూత్, గ్రామ స్థాయి నుంచి నియోజకవర్గ స్థాయి వరకు పార్టీ సీనియర్ నేతల పర్యవేక్షణలో పనిచేస్తారు. చంద్రశేఖర్‌రావు, పార్టీ వర్కింగ్‌ ప్రెసిడెంట్‌ కెటి రామారావు ఆదేశాల మేరకు ఎమ్మెల్యే అభ్యర్థులు ఇప్పటికే ప్రచారంలోకి దిగారు.

మొత్తం ప్రచారానికి ప్రణాళిక, ప్రచార సామాగ్రి సరఫరా, బహిరంగ సభలు నిర్వహించడం, కమ్యూనిటీ ఇంటరాక్షన్‌లు, ప్రతి నియోజకవర్గానికి వేర్వేరుగా డిజిటల్ మీడియా ప్రచారంతో సహా మీడియా నిర్వహణతో సహా వివిధ ప్రచార అంశాల కోసం పార్టీ ప్రత్యేక బృందాలను ఏర్పాటు చేసింది. స్థానిక నేతలతో పాటు ఎంపీలు, ఎమ్మెల్సీలు, కార్పొరేషన్ల చైర్‌పర్సన్‌లు, జిల్లా పరిషత్‌ చైర్‌పర్సన్‌లు, ప్రభుత్వంలో కీలక పదవుల్లో ఉన్న సీనియర్‌ నేతలతో పాటు పార్టీలోనూ కీలక పదవుల్లో ఉన్న సీనియర్‌ నేతలను బీఆర్‌ఎస్‌ ప్రతి అసెంబ్లీ నియోజకవర్గంలో వ్యూహాత్మకంగా మోహరించింది. మొత్తం 119 నియోజకవర్గాలకు ఇన్‌ఛార్జ్‌లుగా పనిచేసే బాధ్యతను వారికి అప్పగించారు. ‘‘వివిధ అంశాలను పరిశీలించి ఎన్నికల ప్రచారం కోసం ముఖ్యమంత్రి సమగ్ర ప్రణాళికను రూపొందించారు. ఆయన అభ్యర్థులను ప్రకటించడంతో ప్రత్యర్థులపై మాకు మంచి పట్టుంది’’ అని బీఆర్‌ఎస్ ప్రధాన కార్యదర్శి ఒకరు ప్రముఖ దినపత్రికతో అన్నారు.