కర్ణాటక ఫలితాలతో.. అలర్ట్‌ మోడ్‌లోకి బీఆర్‌ఎస్‌

హైదరాబాద్ : గత ఏడాది అక్టోబరు నుంచి జాతీయ రాజకీయాలపై దృష్టి సారించి, ఇతర రాష్ట్రాలకు పార్టీని విస్తరింపజేస్తున్న భారత రాష్ట్ర సమితి (బీఆర్‌ఎస్) నాయకత్వం.. తన ప్రణాళికలతో ధీమాగా వెళ్లాలని నిర్ణయించుకుంది. కర్నాటక ఎన్నికల్లో కాంగ్రెస్‌ ఘనవిజయం సాధించిన తర్వాత తెలంగాణ రాష్ట్రంలో జరిగే అసెంబ్లీ ఎన్నికలపై ఇప్పుడు దృష్టి సారిస్తోంది.

కర్ణాటక ఎన్నికల ఫలితాలు తెలంగాణ రాష్ట్రంపై ఎలాంటి ప్రభావం చూపబోవని బీఆర్‌ఎస్ వర్కింగ్ ప్రెసిడెంట్, మంత్రి కేటీ రామారావు పేర్కొన్నప్పటికీ, ఆ రాష్ట్రంలో కాంగ్రెస్ సాధించిన అఖండ విజయం బీఆర్‌ఎస్‌ను వ్యూహాత్మకంగా ఆలోచించేలా చేసింది. తెలంగాణ రాష్ట్రంలో డిసెంబర్‌లో అసెంబ్లీ ఎన్నికలు జరగనున్నాయి.

రాష్ట్రంలో మూడోసారి అధికారాన్ని నిలబెట్టుకోవడంపైనే పార్టీ నాయకత్వం దృష్టి సారించాలని భావిస్తున్నట్లు బీఆర్‌ఎస్ వర్గాలు తెలిపాయి. బీఆర్‌ఎస్ నాయకత్వం ప్రస్తుతానికి మహారాష్ట్రపై మాత్రమే దృష్టి సారించి అక్కడి స్థానిక సంస్థల ఎన్నికల్లో పోటీ చేయాలని చూస్తుండగా, అసంతృప్త బీఆర్‌ఎస్ నేతలు కాంగ్రెస్‌లోకి ఫిరాయించకుండా నిరోధించాలని, కర్ణాటకలో అద్భుత విజయం తర్వాత తెలంగాణ రాష్ట్రంలో దాని ఎదుగుదలను ఆపాలని బీఆర్‌ఎస్ నాయకత్వం భావిస్తోంది.

తెలంగాణ రాష్ట్రంలోని దక్షిణాది జిల్లాలు, ముఖ్యంగా అవిభక్త రంగారెడ్డి, మెదక్, మహబూబ్‌నగర్, కర్ణాటకతో సరిహద్దులు పంచుకునే జిల్లాలపై దృష్టి పెట్టాలని పార్టీ నాయకత్వం యోచిస్తోందని వర్గాలు తెలిపాయి. ఈ జిల్లాల ప్రజలకు కర్ణాటకలో సంబంధాలు ఉన్నాయి. కర్ణాటక ఫలితాలు ఈ జిల్లాల ఓటర్లను ప్రభావితం చేసే అవకాశం ఉందని ఆ పార్టీ భావిస్తోంది.

తెలంగాణ రాష్ట్రం ఆవిర్భవించి 10 ఏళ్లు పూర్తయిన సందర్భంగా జూన్‌లో ప్రభుత్వాన్ని, పార్టీ యంత్రాంగాన్ని ప్రజాహిత కార్యక్రమాలతో బిజీగా ఉంచాలని బీఆర్‌ఎస్‌ అధ్యక్షుడు, ముఖ్యమంత్రి కె. చంద్రశేఖర రావు నిర్ణయించారు. సంక్షేమ పథకాలు, అభివృద్ధి కార్యక్రమాల విషయంలో గత తొమ్మిదేళ్లలో బీఆర్‌ఎస్ ప్రభుత్వం సాధించిన విజయాలను ప్రజలకు చేరవేసి వారికి వివరించాలనే ఆలోచన ఉంది.

గత తొమ్మిదేళ్ల ప్రోగ్రెస్‌కార్డులను సిద్ధం చేయాలని అన్ని శాఖల అధికారులను కోరగా, రాష్ట్ర మంత్రులు, బీఆర్‌ఎస్ ఎమ్మెల్యేలు, ఎమ్మెల్సీలు, ఎంపీలు, జిల్లా, అసెంబ్లీ నియోజకవర్గ స్థాయి నాయకులు గ్రామస్థాయిలో సర్పంచ్‌ల నుంచి ఈ నివేదికలు తీసుకోవాలని కోరారు. బీఆర్‌ఎస్ ప్రభుత్వం సాధించిన విజయాలపై డాక్యుమెంటరీలను సిద్ధం చేయాలని, వాటిని సినిమా థియేటర్లు, టీవీలు, ఇతర మాధ్యమాలలో గ్రామ స్థాయి నుండి రాష్ట్ర స్థాయి వరకు ప్రదర్శించాలని శాఖలను కోరారు. శాఖల వారీగా ప్రగతి నివేదికలు ఎలా తయారు చేయాలి, ప్రజలకు చేరేలా చూడాలనే దానిపై అధికారులు, మంత్రులతో సీఎం శనివారం సమీక్షా సమావేశం నిర్వహించారు.