సెల్ఫ్ వెరిఫికేష‌న్ సేవ‌ను ప్రారంభించిన 'కూ'

భార‌తీయ‌ సోష‌ల్ మీడియా ప్లాట్ ఫాం 'కూ' తన వినియోగదారుల కోసం స‌రికొత్త స్వీయ-ధృవీకరణ(self-verification) సేవను ప్రారంభించింది. త‌ద్వ‌రా 'కూ' స్వచ్ఛంద స్వీయ-ధృవీకరణను ప్రారంభించిన‌ మొదటి సోషల్ మీడియా యాప్ గా అవ‌త‌రించింది. వినియోగదారులు ప్రభుత్వం ఆమోదించిన ID కార్డ్‌ని ఉపయోగించడం ద్వారా ప్లాట్‌ఫారమ్‌లో వారి ప్రొఫైల్‌ను సెకన్లలో స్వీయ-ధృవీకరణ చేసుకోవచ్చని 'కూ' ఒక ప్రకటనలో తెలిపింది. దీనిద్వారా ప్రజలు పంచుకునే ఆలోచనలు, అభిప్రాయాలకు ప్రామాణికతను, విశ్వసనీయతను అందిస్తుందని తెలిపింది. ఖాతా ధృవీకరించబడినట్లు గుర్తించడానికి ప్రొఫైల్ ప‌క్క‌న‌ 'కూ' గ్రీన్ టిక్ రూపంలో ఓ మార్క్‌ను విడుద‌ల చేస్తుంది. ఈ ఫీచర్ రూల్ 4(7) ఇన్ఫర్మేషన్ టెక్నాలజీ రూల్స్, 2021కి అనుగుణంగా ప్రవేశపెట్టబడిందని ట్విట‌ర్ ప్రత్యర్థి అయిన 'కూ' యాప్ పేర్కొంది.

మీ Koo ఖాతాను స్వీయ-ధృవీకరణ(self-verification) చేయడం ఎలా?

- వినియోగదారులు ముందుగా తమ ప్రభుత్వ-ID నంబర్‌ను నమోదు చేయాలి.

- వినియోగదారు IDతో జతచేయబడిన ఫోన్ నంబర్‌పై OTPని పొందుతారు.

- OTP విజయవంతంగా జ‌త‌ప‌రిచిన‌ తర్వాత, వినియోగదారు ప్రొఫైల్‌లో గ్రీన్ టిక్‌తో స్వీయ-ధృవీకరణ(self-verification) పొందుతారు.

- 'కూ' ధ్రువీకరణ ప్రక్రియ ప్రభుత్వ-ఆధీనంలో థ‌ర్డ్ పార్టీ ద్వారా నిర్వహించబడతాయి.

- ఈ ప్రక్రియలో 'కూ' ఎలాంటి సమాచారాన్ని నిల్వ చేయదని యాప్ ప్రకటించింది.

ఈ విష‌య‌మై 'కూ' సహ వ్యవస్థాపకుడు & CEO అప్రమేయ రాధాకృష్ణ మాట్లాడుతూ.. "సోషల్ మీడియాలో విశ్వాసం, భద్రతను ప్రోత్సహించడంలో 'కూ' ముందంజలో ఉంది. ప్రపంచంలో స్వచ్ఛంద స్వీయ-ధృవీకరణ వ్యవస్థను ప్రారంభించిన మొట్టమొదటి సోషల్ మీడియా ప్లాట్‌ఫారమ్ అయినందుకు మేము చాలా గర్విస్తున్నాము. మా సురక్షితమైన ధృవీకరణ ప్రక్రియ ద్వారా వినియోగదారులు 30 సెకన్లలోపు స్వీయ-ధృవీకరణను పొందవచ్చు. వినియోగదారులకు మరింత ప్రామాణికతను అందించడానికి, ప్లాట్‌ఫారమ్‌లో బాధ్యతాయుతమైన ప్రవర్తనను ప్రోత్సహించడానికి ఇది ఒక భారీ అడుగు. చాలా సామాజిక మాధ్యమాలు కొన్ని ఖాతాలకు మాత్రమే ఈ శక్తిని ఇస్తాయి. Koo ఇప్పుడు ప్రతి వినియోగదారుకు ఒకే ప్రత్యేక అధికారాన్ని కలిగి ఉండేలా అధికారం కల్పించిన మొదటి ప్లాట్‌ఫారమ్ అని అన్నారు.