భార్య స్నానం చేయడంలేదని విడాకులు కోరిన భర్త..!

ఇటీవ‌ల కాలంలో విడాకుల కేసులు ఎక్కువగా చూస్తున్నాం. చిన్న చిన్న కారణాలతో పండంటి కాపురాన్ని మధ్యలోనే కూల్చేసుకుంటున్నారు. ఎవరో ఒకరు సర్దుకుపోతే సమిసిపోయే సమస్యను చాలా కాంప్లికేటెడ్‌గా తయారు చేసుకుంటున్నారు. తాజాగా ఓ భ‌ర్త విడాకుల కోసం కోర్టును ఆశ్ర‌యించాడు. అయితే.. ఇందుకు అత‌డు చెప్పిన కార‌ణం ఏమిటో తెలిస్తే నవ్వాలో లేక ఏడవాలో తెలియని పరిస్థితి నెలకొంది. ప్ర‌తి రోజు భార్య స్నానం చేయ‌డం లేద‌ని.. విడాకులు ఇప్ప‌టించాల‌ని కోర్టును ఆశ్ర‌యించాడు. ఈ ఘ‌ట‌న ఉత్త‌ర‌ప్ర‌దేశ్‌లోని అలీఘ‌డ్‌లో జ‌రిగింది.

వివ‌రాల్లోకి వెళితే.. చందౌస్ గ్రామానికి చెందిన ఓ ముస్లిం వ్య‌క్తికి క్వార్సీ గ్రామానికి చెందిన ఓ మ‌హిళ‌తో రెండేళ్ల క్రితం వివాహం జ‌రిగింది. వారికి ఏడాది వ‌య‌సు ఉన్న ఓ పాప ఉంది. అత‌డి భార్య రోజు స్నానం చేసేది కాదు. ఈ విష‌యంలో భార్యాభ‌ర్త‌ల మ‌ధ్య నిత్యం గొడ‌వ‌లు జ‌రుగుతుండేవి. విసుగుచెందిన భ‌ర్త‌.. ట్రిపుల్ తలాక్ చెప్పేశాడు. దీంతో అత‌డి భార్య ఉమెన్ ప్రొటెక్ష‌న్ సెల్‌ను ఆశ్రయించింది. తనకు విడాకులు తీసుకోవడం ఇష్టం లేదని.. వివాహ బంధాన్ని కొనసాగించాలనుకుంటున్నట్లు చెప్పింది.

అధికారులు ఆ దంప‌తులు ఇద్ద‌రికి కౌన్సిలింగ్ ఇచ్చారు. అయితే.. భ‌ర్త మాత్రం త‌న‌కు విడాకులు కావాల‌ని ప‌ట్టుబ‌ట్టాడు. అంతేకాకుండా విడాకులు మంజూరు చేయాలంటూ ఓ ద‌ర‌ఖాస్తు వారికి అంద‌జేశాడు. కాగా.. చిన్న చిన్న సమస్యలకే వివాహ బంధాన్ని విచ్ఛిన్నం చేసుకోవద్దని సూచించినట్లు కౌన్సిలర్ తెలిపారు. వారికి ఆలోచించుకోవ‌డానికి కొంత స‌మ‌యం ఇచ్చిన‌ట్లు చెప్పారు.