పోలీసు కేసుల క్లియరెన్స్ ఉండవు.. భవిష్యత్తులో ఆర్మీలో చేరలేరు

అగ్నిపథ్‌ను వ్యతిరేకిస్తూ నిరసనల్లో పాల్గొనేవాళ్లకు హెచ్చరికలు జారీ చేసింది సైన్యం. ఆర్మీ ఉద్యోగార్థులు నిరసనల్లో పాల్గొంటే.. వాళ్ల మీద గనుక పోలీస్‌ కేసులు నమోదు అయితే వాటికి క్లియరెన్స్‌ ఉండబోదని, భవిష్యత్తులో ఆర్మీలో చేరే అవకాశం ఉండదని హెచ్చరించారు ఎయిర్‌ చీఫ్‌ మార్షల్‌ వీఆర్‌ చౌదరి. అగ్నిపథ్ రిక్రూట్‌మెంట్ స్కీమ్‌కు వ్యతిరేకంగా యువకులు వీధుల్లోకి రావడంతో, ఎయిర్ చీఫ్ మార్షల్ వీఆర్ చౌదరి మాట్లాడుతూ ఇంత హింసాత్మక వాతావరణం ఏర్పడుతుందని తాను ఊహించలేదని అన్నారు. ఆందోళనలో పాల్గొనే డిఫెన్స్ ఉద్యోగ ఔత్సాహికులు తర్వాత అధిక మూల్యం చెల్లించుకోవాల్సి వస్తుందని కూడా ఆయన హెచ్చరించారు. "ఈ రకమైన హింసను మేము ఖండిస్తున్నాము. ఇది పరిష్కారం కాదు. ఆందోళనల్లో ప్రమేయం ఉన్నట్లయితే, వారు పోలీసుల నుండి క్లియరెన్స్ పొందలేరు, "అని చీఫ్ ఆఫ్ ఎయిర్ స్టాఫ్ (CAS) ఎయిర్ చీఫ్ మార్షల్ V R చౌదరి అన్నారు.

అగ్నిపథ్ పథకాన్ని సానుకూల దశగా అభివర్ణించిన ఎయిర్ చీఫ్ మార్షల్ చౌదరి, కార్యక్రమం గురించి ఆందోళన ఉన్నవారు సమీపంలోని సైనిక స్టేషన్లు, వైమానిక దళం, నావికా స్థావరాలను సంప్రదించి తమ సందేహాలను నివృత్తి చేసుకోవచ్చని చెప్పారు. "వారు ఇప్పుడు చేయవలసింది సరైన సమాచారాన్ని పొందడం, పథకాన్ని పూర్తిగా అర్థం చేసుకోవడం. సందేహాలన్నింటినీ నివృత్తి చేస్తుందని నేను ఖచ్చితంగా అనుకుంటున్నాను"అన్నారాయన. అగ్నిపత్ షార్ట్ టర్మ్ రిక్రూట్‌మెంట్ స్కీమ్ గత రెండేళ్లుగా తయారు చేయబడుతోందని, సాయుధ దళాల వయస్సు ప్రొఫైల్‌ను 30 నుండి 25 సంవత్సరాలకు తగ్గించడం లక్ష్యంగా పెట్టుకున్నట్లు చీఫ్ ఆఫ్ ఎయిర్ స్టాఫ్ తెలిపింది.