కాంగ్రెస్‌ ప్లీనరీ సమావేశాలకు సోనియా, రాహుల్‌ దూరం

కాంగ్రెస్ పార్టీ 85వ ప్లీనరీ సమావేశాలు ఇవాళ్టి నుంచి ప్రారంభం అయ్యాయి. ఏఐసీసీ చీఫ్‌ మల్లికార్జున ఖర్గే అధ్యక్షతన ఛత్తీస్‌గఢ్ రాజధాని రాయ్‌పూర్ వేదికగా ఈ సమావేశాలు 3 రోజుల పాటు జరుగుతాయి. సమావేశాల సందర్భంగా ఇవాళ ఉదయం 10 గంటల నుంచి కాంగ్రెస్ పార్టీ స్టీరింగ్ కమిటీ సమావేశం జరుగుతోంది. ప్లీనరీ సమావేశాల్లో మొత్తం 6 తీర్మానాలను ప్రవేశపెట్టనున్నారు. ఇవాళ సాయంత్రం 4 గంటలకు తీర్మానాలను ఖరారు చేయనున్నారు. అయితే ఈ సమావేశాలకు పార్టీ అగ్రనేతలు సోనియాగాంధీ, రాహుల్‌ గాంధీ, ప్రియాంక గాంధీలు దూరంగా ఉన్నారు.

కాంగ్రెస్ పార్టీ 85వ ప్లీనరీ సమావేశంలో పార్టీ అధినేత మల్లికార్జున్ ఖర్గేకు కాంగ్రెస్‌ను నడపడానికి పూర్తి స్వేచ్ఛను ఇచ్చారని చూపించే క్రమంలో గాంధీలు కీలకమైన స్టీరింగ్ కమిటీ సమావేశాన్ని దాటవేశారు. గాంధీలు రాజకీయాల్లో చురుగ్గా ఉన్నప్పటికీ ఏఐసీసీ స్టీరింగ్‌ కమిటీ సమావేశానికి హాజరుకాకపోవడం 25 ఏళ్లలో ఇదే తొలిసారి. మల్లికార్జున్ ఖర్గేకు "కాంగ్రెస్‌ను నడపడానికి ఫ్రీ హ్యాండ్" ఇచ్చినట్లు పార్టీ హైకమాండ్ ఇచ్చిన పెద్ద సంకేతం ఇదేనని కాంగ్రెస్ వర్గాలు అంటున్నాయి.

సీనియర్ స్టీరింగ్ కమిటీ సభ్యుడు మాట్లాడుతూ..''ప్లీనరీలో స్టీరింగ్ కమిటీ సమావేశానికి గాంధీలు హాజరుకారు. కాంగ్రెస్‌ ఇప్పుడు ఖర్గే ఆధ్వర్యంలో నడుస్తుందని సూచిస్తుంది. పార్టీని నడపడానికి ఖర్గేజీకి స్వేచ్ఛనిచ్చారనే సందేశం బలంగా, స్పష్టంగా ఉంది.'' అని అన్నారు. మరో స్టీరింగ్ కమిటీ సభ్యుడు, ఎంపీ మాట్లాడుతూ.. "స్టీరింగ్ కమిటీ సమావేశానికి గాంధీలు హాజరుకాకపోవడం అపూర్వమైనది. గత 25 ఏళ్లలో ఏ గాంధీ కూడా హాజరుకాకపోవడం ఇదే తొలిసారి. ఈ కీలక సమావేశంలో హాజరవుతున్నాను. ఖర్గేపై పార్టీ నాయకత్వం నుంచి ఎలాంటి ఒత్తిడి లేదని, సంస్థ ఎలా నడుస్తుందనేది ఇప్పుడు ఆయనకే వదిలేస్తున్నట్లు సందేశం ఉంది'' అని అన్నారు.

పార్టీ వర్గాల సమాచారం ప్రకారం.. రాహుల్ గాంధీ పార్టీకి "బాహ్య" ముఖంగా, మల్లికార్జున్ ఖర్గే అంతర్గత ముఖంగా ఉంటారు. "ఇది బాగా ఆలోచించిన వ్యూహం, ఇక్కడ కాంగ్రెస్ అధ్యక్షుడు సంస్థ అంతర్గత విషయాలను చూసుకుంటారు. ప్రజలతో పార్టీ అనుబంధాన్ని బలోపేతం చేయడానికి రాహుల్ గాంధీజీ పని చేస్తారు" అని ఏఐసీసీ విభాగాధిపతి చెప్పారు. కీలకమైన స్టీరింగ్ కమిటీ సమావేశంలో దాదాపు 50 మంది కాంగ్రెస్ అగ్రనేతలు సమావేశం కానున్నారు. మూడు రోజుల పాటు జరిగే ఏఐసీసీ ప్లీనరీ సమావేశంలో 15,000 మందికి పైగా పార్టీ ప్రతినిధులు పాల్గొననున్నారు. ఈరోజు రాహుల్ గాంధీ, సోనియా గాంధీ రాయ్‌పూర్‌కు వస్తారని, ఫిబ్రవరి 25న ప్రియాంక గాంధీ వస్తారని విశ్వసనీయ వర్గాల సమాచారం.

సమావేశాల్లో భాగంగా రేపు ఉదయం 9:30 గంటలకు ‘పార్టీ జెండా’ వందనం తర్వాత కాంగ్రెస్ పార్టీ అధ్యక్షుడి ఉపన్యాసం ఉంటుంది. అలాగే రేపు మూడు తీర్మానాలను పార్టీ ఆమోదించనుంది. ఇందులో రాజకీయ, ఆర్థిక, విదేశీ విధానానికి సంబంధించి తీర్మానాలు ప్రవేశపెట్టి చర్చించి, ఆమోదించనున్నారు. ఆదివారం నాడు మరో మూడు తీర్మానాలను ప్రవేశపెట్టనున్నారు. యువత-నిరుద్యోగం, సామాజిక న్యాయం-సాధికారత, వ్యవసాయరంగ సమస్యలు ఏఐసీసీ చర్చించనుంది. చివరి రోజు ఆదివారం మధ్యాహ్నం రెండు గంటలకు అధ్యక్షుడు ఖర్గే ఉపన్యాసంతో ప్లీనరీ ముగియనుంది.