లోక్‌సభ స్పీకర్‌పై అవిశ్వాసం చర్చ, ఓటింగ్‌కు డేట్ ఫిక్స్!

ఢిల్లీ: పార్లమెంట్ వేదికగా అధికార, ప్రతిపక్షాల మధ్య కొనసాగుతున్న రాజకీయ యుద్ధం పతాక స్థాయికి చేరింది. లోక్‌సభ స్పీకర్ ఓం బిర్లాను పదవి నుంచి తొలగించాలని కోరుతూ ప్రతిపక్షాలు ఇచ్చిన నోటీసుపై చర్చకు కేంద్ర ప్రభుత్వం గ్రీన్ సిగ్నల్ ఇచ్చింది. ఈ మేరకు మార్చి 9న సభలో చర్చ మరియు ఓటింగ్ నిర్వహించనున్నట్లు పార్లమెంటరీ వ్యవహారాల శాఖ మంత్రి కిరణ్ రిజిజు వెల్లడించారు. మార్చి 9న లోక్‌సభలో స్పీకర్‌పై ప్రవేశపెట్టిన అవిశ్వాస తీర్మానంపై చర్చ జరుగుతుంది. మొదటి రోజే దానిని చేపట్టడం నియమం. చర్చ తర్వాత ఓటింగ్ ఉంటుంది" అని ఆయన పిటిఐకి ఇచ్చిన ఇంటర్వ్యూలో అన్నారు.

మార్చి 9 నుండి ఏప్రిల్ 2 వరకు జరగనున్న బడ్జెట్ సమావేశాల రెండవ భాగం ఆసక్తికరంగా ఉంటుందని, అనేక "ముఖ్యమైన" చట్టాలు మరియు "క్లిష్టమైన" బిల్లును పార్లమెంటులో చర్చ మరియు ఆమోదం కోసం ప్రవేశపెడతామని రిజిజు పేర్కొన్నారు. ప్రతిపక్ష పార్టీలు సమావేశాల మొదటి భాగంలో చేసినట్లుగానే తమ నిరసనలను కొనసాగిస్తే, చివరికి అది వారికే హానికరం అవుతుందని ఆయన హెచ్చరించారు.

ప్రతిపక్షాల ఆరోపణలు-ప్రభుత్వ ధీమా

సభ నిర్వహణలో స్పీకర్ ఏకపక్షంగా వ్యవహరిస్తున్నారని, ప్రతిపక్షాల గొంతు నొక్కుతున్నారని ఆరోపిస్తూ ఇండియా కూటమి సభ్యులు ఈ తొలగింపు తీర్మానాన్ని ప్రతిపాదించారు. అయితే, ప్రభుత్వం మాత్రం ఈ ఆరోపణలను కొట్టిపారేస్తోంది. లోక్‌సభలో ప్రస్తుతం ఉన్న బలాబలాల దృష్ట్యా ఈ తీర్మానాన్ని నెగ్గించుకోవడం ప్రతిపక్షాలకు సవాలుతో కూడుకున్న పని. ఎన్డీయే కూటమికి స్పష్టమైన మెజారిటీ ఉండటంతో ఓటింగ్ ఫలితంపై అధికార పక్షం ధీమాగా ఉంది.

జనవరి 28న పార్లమెంటు ఉభయ సభలను ఉద్దేశించి రాష్ట్రపతి ప్రసంగించడంతో బడ్జెట్ సమావేశాలు ప్రారంభమయ్యాయి. ఫిబ్రవరి 12న విరామం తీసుకున్నాయి. 2026 కేంద్ర బడ్జెట్‌ను ఫిబ్రవరి 1న సమర్పించారు. ఈ సమావేశాలు మార్చి 9న తిరిగి ప్రారంభమై ఏప్రిల్ 2న ముగుస్తాయి.