చెంపదెబ్బలు కొట్టారు.. నటి రన్యా రావు సంచలన ఆరోపణలు

బంగారం అక్రమ రవాణా కేసులో అరెస్టయిన కన్నడ నటి రన్యా రావు సంచలన ఆరోపణలు చేశారు. డైరెక్టరేట్ ఆఫ్ రెవెన్యూ ఇంటెలిజెన్స్ అధికారులు తనను పలుమార్లు చెంపదెబ్బ కొట్టారని, ఆహారం కూడా ఇవ్వలేదని, ఖాళీ పత్రాలపై సంతకం చేయమని బలవంతం చేశారని ఆరోపించారు. DRI అదనపు డైరెక్టర్ జనరల్‌కు రాసిన లేఖలో, రన్యా తన నిర్దోషిత్వాన్ని సమర్థించుకుంటూ, తనను తప్పుడు కేసులో ఇరికించారని తెలిపింది.

నటి రన్యా రావు బెంగళూరు విమానాశ్రయంలో రూ.12.56 కోట్ల విలువైన బంగారు కడ్డీలను తరలిస్తూ పట్టుబడింది. పరప్పన అగ్రహార జైలు చీఫ్ సూపరింటెండెంట్ ద్వారా పంపిన తన లేఖలో, తనను విమానంలోనే అరెస్టు చేశారని, వివరణ ఇవ్వడానికి అవకాశం ఇవ్వకుండా DRI అదుపులోకి తీసుకున్నారని రన్యా పేర్కొన్నారు. పదే పదే తనపై దాడి చేసినా, DRI అధికారులు తయారుచేసిన స్టేట్‌మెంట్‌లపై సంతకం చేయడానికి తాను నిరాకరించానని కూడా ఆమె పేర్కొంది. తీవ్ర ఒత్తిడితో చివరికి 50-60 టైప్ చేసిన పేజీలు, 40 ఖాళీ తెల్ల పేజీలపై సంతకం చేయవలసి వచ్చిందని నటి తెలిపింది.