తత్కాల్ టికెట్ బుకింగ్‌కు సంబంధించి భారీ మార్పు చేయ‌నున్న రైల్వే
రైల్వే టిక్కెట్ల బ్లాక్ మార్కెటింగ్‌ను అరికట్టేందుకు కేంద్ర ప్రభుత్వం కఠిన చర్యలు తీసుకోనుంది.
By Medi Samrat
రైల్వే టిక్కెట్ల బ్లాక్ మార్కెటింగ్‌ను అరికట్టేందుకు కేంద్ర ప్రభుత్వం కఠిన చర్యలు తీసుకోనుంది. తత్కాల్ టికెట్ బుకింగ్ కోసం ఈ-ఆధార్ వెరిఫికేషన్ సదుపాయాన్ని భారతీయ రైల్వే త్వరలో ప్రారంభించనున్నట్లు కేంద్ర మంత్రి అశ్విని వైష్ణవ్ ట్వీట్‌లో తెలియజేశారు. తద్వారా నిజమైన ప్రయాణికులు మాత్ర‌మే తత్కాల్ టికెట్ సదుపాయాన్ని ఉపయోగించుకోగ‌లుగుతారు.
తత్కాల్ టికెట్ బుకింగ్ కోసం భారతీయ రైల్వే త్వరలో ఈ-ఆధార్ వెరిఫికేషన్‌ను ప్రవేశపెడుతుందని అశ్విని వైష్ణవ్ తెలిపారు. దీని ద్వారా.. నిజమైన ప్రయాణీకులకు అవసరమైన సమయంలో కన్ఫర్మ్ చేసిన టిక్కెట్లను పొందడం సులభం అవుతుంది. టౌట్‌లను ఆపడం, నిజమైన ప్రయాణీకులకు ప్రాధాన్యత ఇవ్వడం ఈ కొత్త సిస్టమ్ యొక్క లక్ష్యం.
తత్కాల్ టిక్కెట్ల బ్లాక్ మార్కెటింగ్‌ను అరికట్టేందుకు, IRCTC 2.5 కోట్ల నకిలీ యూజర్ ఐడీలను డీయాక్టివేట్ చేసింది. నిబంధనలను ఉల్లంఘించే వ్యక్తులు లేదా ఏజెంట్ల ద్వారా ఈ IDలు అమలు చేయబడుతున్నాయి. రైల్వే మంత్రిత్వ శాఖ అధికార ప్రతినిధి దిలీప్ కుమార్ మాట్లాడుతూ.. రైల్వే తన టికెట్ బుకింగ్ విధానాన్ని డిజిటల్‌గా పూర్తిగా ఆధునీకరించిందని తెలిపారు. వెబ్‌సైట్‌లో ఆర్టిఫిషియల్ ఇంటెలిజెన్స్ ఆధారిత యాంటీ-బాట్ సిస్టమ్ ఇన్‌స్టాల్ చేయబడింది. ఇది నకిలీ, ఆటోమేటిక్ బుకింగ్‌లను చేసే బాట్‌లను వెంటనే గుర్తించి బ్లాక్ చేస్తుందన్నారు.
