పార్లమెంట్‌ హౌస్‌ కాంప్లెక్స్‌లో ఎంపీల మధ్య ఘర్షణ

ఈరోజు కూడా పార్లమెంట్ ఉభయ సభల్లో గందరగోళం నెలకొంది. బాబా సాహెబ్‌ భీమ్‌రావ్‌ అంబేద్కర్‌ సమస్యపై కాంగ్రెస్‌, బీజేపీలు పార్లమెంట్‌ హౌస్‌ కాంప్లెక్స్‌లో పోటాపోటీగా నిర‌స‌న వ్య‌క్తం చేశాయి. ఈ సమయంలో మకరద్వార్ వద్ద ఇరు పార్టీల ఎంపీల మధ్య తోపులాట జరిగింది. ఈ తోపులాట‌లో బీజేపీ ఎంపీ ప్రతాప్ సారంగి తలకు గాయమైంది. ఈ ఘటనలో బీజేపీ ఎంపీ ముఖేష్ రాజ్‌పుత్ కూడా గాయపడ్డారు. అతని పరిస్థితి విషమంగా ఉంది. అతడిని ఆర్‌ఎంఎల్‌ ఆస్పత్రిలోని ఐసీయూలో చేర్చారు. సారంగి కూడా ఇదే ఆసుపత్రిలో చికిత్స పొందుతున్నారు.

అంబేద్కర్‌పై కేంద్ర హోంమంత్రి అమిత్ షా చేసిన ప్రకటనకు వ్యతిరేకంగా కాంగ్రెస్ పార్లమెంటు హౌస్ కాంప్లెక్స్‌లో మార్చ్ నిర్వహించింది. కాంగ్రెస్‌ అబద్ధాల రాజకీయాలకు పాల్పడుతోందని బీజేపీ ఆరోపిస్తూ నిరసన వ్యక్తం చేసింది. ఈ సందర్భంగా పార్లమెంట్‌ హౌస్‌లోని మకర్‌ గేట్‌ వద్ద ఇరు పార్టీల ఎంపీలు ముఖాముఖికి దిగారు. దీంతో ఇరు వ‌ర్గాల మ‌ధ్య‌ తోపులాట జరిగింది.

ఈ ఘ‌ట‌న‌లో ప్రతాప్ సారంగి గాయపడి కనిపించారు. ఆయ‌న‌ను ప్రశ్నించగా.. నేను మెట్ల దగ్గర నిలబడి ఉండగా రాహుల్ గాంధీ వచ్చి ఒక ఎంపీని తోసాడు, అతను నాపై పడ్డాడు.. దీంతో నేను ప‌డిపోయాన‌ని పేర్కొన్నారు. మరోవైపు కేంద్ర మంత్రి ప్రహ్లాద్ జోషి, అర్జున్ రామ్ మేఘ్వాల్, పీయూష్ గోయల్, ఇతర బీజేపీ నేతలు పార్టీ ఎంపీ ప్రతాప్ సారంగిని చూసేందుకు ఆర్‌ఎంఎల్ ఆస్పత్రికి చేరుకున్నారు.

ఈ విషయమై రాహుల్ గాంధీని ప్రశ్నించగా.. మీ కెమెరాలో ఇలా జరిగి ఉండొచ్చని అన్నారు. నేను పార్లమెంట్‌ ప్రవేశ ద్వారం నుంచి లోపలికి వెళ్లేందుకు ప్రయత్నించగా.. బీజేపీ ఎంపీలు అడ్డుకుని, నెట్టేందుకు, బెదిరించేందుకు ప్రయత్నించారు. అందుకే అలా జరిగింది. అవును, అది జరిగింది. మల్లికార్జున్ ఖర్గేను నిలదీశారు. ప్రియాంక గాంధీని కూడా నెట్టారు. ఇది ప్రవేశ ద్వారం.. లోపలికి వెళ్ళే హక్కు మాకు ఉంది. బీజేపీ ఎంపీలు మమ్మల్ని లోపలికి వెళ్లకుండా అడ్డుకునే ప్రయత్నం చేశారు. రాజ్యాంగంపై దాడి చేయడం, అంబేద్కర్ స్మృతిని అవమానించడమే బీజేపీ ల‌క్ష్యం అన్నారు.