ఒడిశా మంత్రివర్గ పునర్వ్యవస్థీకరణ.. రేపు కొత్త మంత్రులు ప్ర‌మాణ‌స్వీకారం

ఒడిశా ముఖ్యమంత్రి నవీన్ పట్నాయక్ తన మంత్రి మండలిని పునర్వ్యవస్థీకరించనున్నారు. కొత్తగా కేబినెట్‌లో చేర‌నున్న మంత్రులు సోమవారం భువనేశ్వర్‌లోని లోక్ సేవా భవన్‌లో ప్రమాణ స్వీకారం చేయనున్నారు. రేపు ఉదయం 9.50 గంటలకు లోక్‌సేవా భవన్‌లోని సమావేశ మందిరంలో గవర్నర్ ప్రొఫెసర్ గణేశిలాల్ కొత్త మంత్రులతో ప్రమాణం చేయిస్తారు. ఆహ్వానితులందరూ ఉదయం 9 గంటలకు లోక్ సేవా భవన్‌కు హాజరు కావాలని ఒడిశా ప్రభుత్వ ప్రధాన కార్యదర్శి ప్రదీప్ కుమార్ జెనా కోరారు.

ఇద్దరు మంత్రులు రాజీనామా చేయడంతో కేబినెట్ పునర్వ్యవస్థీకరణ అనివార్యమైంది. ఇది కాకుండా, జనవరిలో ఆరోగ్య, కుటుంబ సంక్షేమ శాఖ మంత్రి నబా దాస్ హత్య తర్వాత మరో స్థానం ఖాళీగా ఉంది. మే 12న ఒడిశా అసెంబ్లీ స్పీకర్ బిక్రమ్ కేశరీ అరుఖా, పాఠశాల, విద్యాశాఖ మంత్రి సమీర్ రంజన్ దాష్, కార్మిక శాఖ మంత్రి శ్రీకాంత సాహు తమ పదవులకు రాజీనామా చేశారు. అరుఖా స్థానంలో కొత్త స్పీకర్‌ను ప్రభుత్వం నియమించనుంది. దీంతో పాటు ఖాళీ అయిన స్థానాల స్థానంలో ముగ్గురు కొత్త మంత్రులను కూడా చేర్చుకోనున్నారు. మంత్రి పదవి రేసులో నబా దాస్ కుమార్తె దిపాలి దాస్ పేరు తెరపైకి వచ్చింది. పశ్చిమ ఒడిశా నుండి సుశాంత సింగ్, శారదా నాయక్ కూడా పోటీలో ఉన్నారని ఊహాగానాలు కూడా ఉన్నాయి. కోస్టల్ బెల్ట్ నుండి దేబి మిశ్రా, ప్రశాంత ముదులి, బిక్రమ్ కేశరి అరుఖా, ఉమాకాంత సామంతరాయ్, బ్యోమకేష్ రే వంటి సీనియర్ నాయకులు మంత్రి బెర్త్ కోసం రేసులో ఉన్నారు.

మరోవైపు అసెంబ్లీ స్పీకర్ స్థానానికి అమర్ సతపతి, శశిభూషణ్ బెహెరా, దేబీ ప్రసాద్ మిశ్రా, ప్రఫుల్ల సమల్, నిరంజన్ పూజారి రేసులో ఉన్నారు. 2024 సార్వత్రిక ఎన్నికలకు ముందు.. క్యాబినెట్ చివరి పునర్వ్యవస్థీకరణ కావడంతో చాలా మంది ఎమ్మెల్యేలు బెర్త్ కోసం లాబీయింగ్ ప్రారంభించారు.