హరీష్‌కు మంత్రి అడ్లూరి ఛాలెంజ్
మాజీ మంత్రి, బీఆర్ఎస్ సీనియ‌ర్ నేత హరీష్ రావుకు మంత్రి అడ్లూరి లక్ష్మణ్ ఛాలెంజ్ విసిరారు.
By - Medi Samrat
మాజీ మంత్రి, బీఆర్ఎస్ సీనియ‌ర్ నేత హరీష్ రావుకు మంత్రి అడ్లూరి లక్ష్మణ్ ఛాలెంజ్ విసిరారు. హరీష్ ఇటీవ‌ల చేసిన ఆరోణ‌ల‌పై సిద్దిపేట వెంకటేశ్వర ఆలయంలో ప్రమాణం చేద్దామా.? అంటూ ఛాలెంజ్ విసిరారు. హరీష్.. సెంటిమెంట్‌గా భావించే దేవుడిపై ప్రమాణం చేయగలవా? ఇద్దరం తడిబట్టలతో ప్రమాణం చేద్దామా.? అంటూ స‌వాల్ విసిరారు. మా తల్లిదండ్రులపై ప్రమాణం చేసి నేను ప్రమాణం చేస్తానన్నారు.
నేను ముఖ్యమంత్రి అనుమతి తీసుకొని వస్తాను.. కేబినెట్ సమావేశంలో వ్యక్తిగత అంశాలు చర్చ చేయలేదని నేను ప్రమాణం చేస్తాను.. హరీష్.. ఆరోపించిన విషయాలను నిజమని ప్రమాణం చేయగలవా.? అని స‌వాల్ విసిరారు. హరీష్ బేషరతుగా క్షమాపణ చెప్పాలని డిమాండ్ చేశారు. కేబినెట్‌పై బీఆర్ఎస్ నేతలు అనుచిత వ్యాఖ్యలు చేస్తున్నారు.. కేబినెట్ మంత్రులను దండుపాళ్యం బ్యాచ్ అంటారా.? హరీష్ రావు బాడీ లాంగ్వేజ్ ఎలా ఉంటుందని ఎద్దేవా చేశారు.
కేబినెట్‌లో జరగని విషయాలను జరిగాయని ప్రచారం చేయడం దుర్మార్గం అన్నారు. అబద్ధాలకు కేరాఫ్ అడ్రస్ బీఆర్ఎస్ పార్టీ.. బీఆర్ఎస్ ప్రభుత్వం ఉన్నప్పుడు కాంగ్రెస్ సోషల్ మీడియా కార్యకర్తలపై దాదాపు 600 పైగా ఎఫ్ఐఆర్ లు నమోదు చేశారన్నారు. ఉస్మానియా యూనివర్సిటీ విద్యార్థులపై గత ప్రభుత్వం క్రూరంగా ప్రవర్తించిందన్నారు. రైతుల చేతులకు బేడీలు వేసిన చరిత్ర కేసీఆర్ ప్రభుత్వానిది.. పదేండ్లు మేమే రాజులం.. మేమే మంత్రులం అన్నట్టు వ్యవహరించారు.. కేటీఆర్ నియోజకవర్గంలో దళితులపై దాడి చేసినప్పుడు ఎక్కడ పోయాడు.? అని ప్ర‌శ్నించారు.
