ఎంబీబీఎస్ విద్యార్థినిపై సామూహిక అత్యాచారం.. కళాశాల యాజమాన్యం నుంచి నివేదిక కోరిన ఆరోగ్య శాఖ

ప‌శ్చిమ బెంగాల్‌ దుర్గాపూర్‌లోని ఓ ప్రైవేట్ మెడికల్ కాలేజీ విద్యార్థినిపై సామూహిక అత్యాచారం జరిగిన ఘటనపై బెంగాల్ ప్రభుత్వ ఆరోగ్య శాఖ కాలేజీ యాజమాన్యాన్ని నివేదిక కోరింది. ఈ ఘటన ఎప్పుడు, ఎలా జరిగిందన్న పూర్తి వివరాలను తెలియజేయాలని కోరారు. సమాచారం మేరకు బాధితురాలు శుక్రవారం రాత్రి స్నేహితుడితో కలిసి భోజనానికి వెళ్లింది. దారిలో ఇద్దరు ముగ్గురు యువకులు వారిని అడ్డుకుని విద్యార్థినిని నిర్జన ప్రదేశానికి బలవంతంగా తీసుకెళ్లి సామూహిక అత్యాచారానికి పాల్పడ్డారు. ఈ కేసులో బాధితురాలి స్నేహితుడి పాత్రపై అనుమానాలు వ్యక్తమవుతున్నాయి.

మరోవైపు ఈ ఘటనపై బీజేపీ రాజకీయాలు చేస్తోందని రాష్ట్ర మహిళా శిశు సంక్షేమ శాఖ మంత్రి, తృణమూల్ సీనియర్ నేత డాక్టర్ శశి పంజా ఆరోపించారు. బీజేపీ ప్రభుత్వంలో ఉన్న ఒడిశాలోనూ ఇటీవల కాలేజీ విద్యార్థినిపై అత్యాచారం ఘటన జరిగిందని అన్నారు. బాధిత విద్యార్థిని ఆత్మహత్యకు పాల్పడింది. ఏదైనా ఒక సంఘటన గురించి ప్రశ్నలు లేవనెత్తకూడదు. దేశవ్యాప్తంగా జరుగుతున్న ఇలాంటి సంఘటనలన్నింటిపై ప్రశ్నలు లేవనెత్తాల్సి వస్తే అది చేయాలి. ఇలాంటి సంఘటనలు ఎక్కడ జరిగినా దురదృష్టకరం. అవాంఛనీయమైనవి. ఈ ఘటనపై రాష్ట్ర ప్రభుత్వం విచారణ ప్రారంభించిందని డాక్టర్ శశి పంజా తెలిపారు.

ఈ ఘటనపై బీజేపీ మమత ప్రభుత్వాన్ని తీవ్రంగా టార్గెట్ చేసింది. బెంగాల్‌లో ఎక్కడ చూసినా మహిళలకు భద్రత లేదని దుర్గాపూర్ ఘటన రుజువు చేస్తోందని కేంద్ర విద్యాశాఖ సహాయ మంత్రి, రాష్ట్ర బీజేపీ మాజీ అధ్యక్షుడు సుకాంత్ మజుందార్ అన్నారు. ముఖ్యమంత్రి మమతా బెనర్జీ విఫలమైన, అస్తవ్యస్తమైన పాలనలో బెంగాల్ మహిళలకు పీడకలగా మారింది. మమతా బెనర్జీ బెంగాల్‌ను రేపిస్టులు, నేరస్థులకు సురక్షితమైన స్వర్గధామంగా మార్చార‌న్నారు..

ఇదిలా ఉండగా.. తృణమూల్ ప్రభుత్వం బాధ్యత వహించే వరకు రాష్ట్రంలోని మహిళలు భయంతో జీవిస్తారని బీజేపీ ఐటీ సెల్ హెడ్, బెంగాల్‌లో పార్టీ కేంద్ర సహ పరిశీలకుడు అమిత్ మాల్వియా అన్నారు. మమతా బెనర్జీ 2026లో అధికారం నుంచి తప్పుకోవాల్సి వస్తుందన్నారు.