కలకలం రేపుతోన్న పోస్టర్‌.. దుర్గ మాతగా దీదీ.. మహిషాసురుడిగా ప్రధాని మోదీ

పశ్చిమ బెంగాల్ ముఖ్యమంత్రి మమతా బెనర్జీని 'దుర్గ'గా, ప్రధాని నరేంద్ర మోదీని 'మహిషాసురుడు'గా చూపుతున్న పోస్టర్ ఆ రాష్ట్రంలో కలకలం రేపింది. ఇది ప్రధానిని, సనతాన ధర్మాన్ని అవమానించడమేనని పేర్కొంటూ, ఈ విషయంపై పార్టీ ఎన్నికల సంఘాన్ని ఆశ్రయిస్తామని బీజేపీ నేత ఒకరు తెలిపారు. పశ్చిమ బెంగాల్ జిల్లా మిడ్నాపూర్‌లో ఈ పోస్టర్‌ను ఉంచారు. పోస్టర్‌లో మమతా బెనర్జీని 'దుర్గా' దేవతగా చూపుతుండగా, ప్రధాని మోడీ, కేంద్ర హోం మంత్రి అమిత్ షాలను హిందూ పురాణాలలో రాక్షసుడు మహిషాసురుడిగా చిత్రీకరించారు.

పోస్టర్‌లో ప్రతిపక్ష పార్టీలను మేకలుగా చూపిస్తూ "ఎవరైనా తమకు (ప్రతిపక్ష పార్టీలకు) ఓటు వేస్తే, వారు బలి అవుతారు" అనే సందేశాన్ని కలిగి ఉంది. ఇది మిడ్నాపూర్ జిల్లాలో కలకలం రేపింది. నాయకులను దేవతలుగా చూపించడం సనాతన ధర్మాన్ని అవమానించడమేనని స్థానిక బీజేపీ నాయకుడు విపుల్ ఆచార్య అన్నారు. ఇది మన ప్రధాని, హోంమంత్రిని కూడా అవమానించడమేనని ఆయన అన్నారు. కాగా, ఈ పోస్టర్‌ ఎవరు అంటించారో కూడా తనకు తెలియదని టీఎంసీ నేత అనిమా సాహా అన్నారు. "ఈ విషయం నాకు తెలిసి ఉంటే, ఆ ప్రాంతంలో ఇలాంటి పోస్టర్లు పెట్టడానికి నేను ఎప్పుడూ అనుమతించను" అని అనిమా సాహా అన్నారు.

పశ్చిమ బెంగాల్‌లో పౌర ఎన్నికలు సమీపిస్తున్న సమయంలో పోస్టర్‌పై వివాదం చెలరేగింది. 108 మున్సిపాలిటీలకు ఫిబ్రవరి 27న ఎన్నికలు జరగనున్నాయి. పురాణాల ప్రకారం, దుర్గా దేవి మహిషాసురునితో పదిహేను రోజుల పాటు పోరాడింది. ఆ సమయంలో అతను వివిధ జంతువులుగా మారుతూ ఆమెను తప్పుదారి పట్టించాడు. చివరగా, అతను గేదెగా రూపాంతరం చెందినప్పుడు, దుర్గాదేవి తన త్రిశూలంతో అతనిని పొడిచింది. మహిషాసురుడు మహాలయ నాడు పరాజయం పాలయ్యాడు.