రేప్ కేసు నిందితుడిని అప్పుడు ఉరి తీయ‌మ‌న్న‌ది వాళ్లే.. ఇప్పుడు కాల్పుల‌లో చ‌నిపోతే మాత్రం..

మహారాష్ట్రలో ఎన్నికల కంటే ముందే వాతావరణం వేడెక్కింది. ఇప్పుడు మరో వివాదం తెరపైకి వచ్చింది. బద్లాపూర్ పట్టణంలోని ఓ పాఠశాలలో ఇద్దరు బాలికలపై లైంగిక దాడికి పాల్పడిన నిందితుడు అక్షయ్ షిండే పోలీసుల కాల్పుల్లో మరణించాడు. దీంతో నిందితుడి మృతిపై ప్రతిపక్షాలు ప్రశ్నలు సంధించాయి.

పాఠశాలలో స్వీపర్‌గా పనిచేస్తున్న షిండేను మరో కేసు విచారణ నిమిత్తం సోమవారం తలోజా జైలు నుంచి బద్లాపూర్‌కు తీసుకెళ్తుండగా.. ఓ పోలీసు తుపాకీ లాక్కుని కాల్పులు జరిపాడని పోలీసులు తెలిపారు. దీనికి ప్రతిగా పోలీసులు కూడా కాల్పులు జరిపారు. ఘటన అనంతరం నిందితుడిని కాల్వలోని ఆస్పత్రికి తరలించగా.. చికిత్స పొందుతూ మృతి చెందాడు.

ఈ ఘటనపై విపక్షాలు ఆశ్చర్యం వ్యక్తం చేస్తూ.. దీనిపై సమగ్ర న్యాయ విచారణకు డిమాండ్ చేశారు. ఈ నేపథ్యంలో ముఖ్యమంత్రి ఏక్‌నాథ్ షిండే మాట్లాడుతూ.. ఆత్మరక్షణ కోసమే పోలీసులు నిందితుడిని కాల్చిచంపారని అన్నారు. అక్షయ్ షిండేను ఉరితీయాలని ప్రతిపక్షాలు గతంలో డిమాండ్ చేశాయి. ఇప్పుడు ఈ వ్యక్తులు నిందితుల పక్షం వహిస్తున్నారు. మహారాష్ట్ర పోలీసుల చిత్తశుద్ధిపై ప్రశ్నలు లేవనెత్తుతున్నారు. ప్రతిపక్ష నేతల చర్యలు ఖండనీయం, దురదృష్టకరం అన్నారు. రాజకీయ సానుభూతి కోసం ప్రతిపక్షాలు ఆరోపణ‌లు చేస్తున్నాయని.. మా ప్రభుత్వ లడ్కీ బెహన్ యోజన విజయవంతం కావడంతో ప్రతిపక్ష నేతలు కలత చెందుతున్నారని అన్నారు.

రాష్ట్ర హోం మంత్రి దేవేంద్ర ఫడ్నవీస్ మాట్లాడుతూ.. ప్రతిపక్షాలు ప్రతి అంశంపై ప్రశ్నలు లేవనెత్తుతున్నాయి. వారు (ప్రతిపక్షాలు) అతన్ని ఉరితీయాలని కోరుకున్నారు. ఇప్పుడు ప్రజల ప్రాణాలను కాపాడేందుకు పోలీసులు ప్రయత్నిస్తే ఇలాంటి ప్రశ్నలు వేయడం సరికాదన్నారు.

బద్లాపూర్ కేసు నిందితుడు షిండే మరణం తర్వాత ప్రతిపక్షాలు అధికార కూటమిపై విరుచుకుపడుతున్నాయి. ఇది సాక్ష్యాలను ధ్వంసం చేసే ప్రయత్నమా అని అసెంబ్లీలో ప్రతిపక్ష నేత విజయ్ వాడెట్టివార్ ప్రశ్నించారు. నిందితుడిని తీసుకెళ్లే సమయంలో పోలీసులు చేతులు కట్టేయలేదా.? అతనికి తుపాకీ ఎలా వచ్చింది.? పోలీసులు ఇంత నిర్లక్ష్యంగా ఎలా వ్యవహరించారు? అని ప్ర‌శ్న‌లు సంధించారు. బీజేపీతో సంబంధం ఉన్న స్కూల్ యాజమాన్యంపై ఎలాంటి చర్యలు తీసుకోలేదని.. అరెస్టు చేసిన నిందితుడిని మాత్రం అనుమానాస్పద స్థితిలో చంపేశారని అన్నారు. తదుపరి న్యాయ విచారణ జరిపించాలని.. బద్లాపూర్ పోలీసులపై త‌మ‌కు నమ్మకం లేదన్నారు.

నేషనలిస్ట్ కాంగ్రెస్ పార్టీ (ఎస్పీ) అధినేత శరద్ పవార్ రాష్ట్ర హోం శాఖను టార్గెట్ చేశారు. ఈ ఘటనలో ప్రధాన నిందితుడు చ‌నిపోవ‌డం అనుమానాస్పదంగా ఉందన్నారు. ప్రభుత్వం బలహీనంగా మారినట్లు కనిపిస్తోందన్నారు.

ఈ ఘటనను 2019లో తెలంగాణలో నలుగురు అత్యాచార నిందితులను కాల్చిచంపిన ఘటనతో శివసేన (యుబిటి) అధికార ప్రతినిధి సుష్మా అంధారే పోల్చారు. ఆత్మరక్షణ కోసమే ఇలా చేశామని అక్క‌డి పోలీసులు కూడా చెప్పారు.

అయితే ఈ మరణాల కారణంగా అసలు విషయం బయటకు రాలేదు. బద్లాపూర్ లైంగిక వేధింపుల కేసులోనూ అదే పరిస్థితి నెలకొంది. అక్షయ్ షిండే కేసులోనూ దారుణమైన విషయాన్ని దాచిపెట్టి హత్య చేశారా.? పాఠశాల యాజమాన్యం ఎందుకు పరారీలో ఉంది.? అని ప్ర‌శ్నించారు. రాష్ట్ర హోంమంత్రి సీరియస్‌ విషయాలను డీల్‌ చేయలేకపోతున్నారని దీన్నిబట్టి అర్థమవుతోంది. హోం పోర్ట్‌ఫోలియోను కలిగి ఉన్న ఫడ్నవీస్ ఈ ప్రశ్నలకు సమాధానం ఇవ్వాలి. సీరియస్ వ్యవహారాల్లో రాష్ట్ర హోంమంత్రి అసమర్థత ఏంటో ఈ ఘ‌ట‌న‌ చూపిస్తోందన్నారు.

ఆగస్టు 12న పాఠశాల టాయిలెట్‌లో షిండే ఇద్దరు బాలికలపై లైంగిక దాడికి పాల్పడ్డాడు. ఈ విషయం వెలుగులోకి రావడంతో పెద్ద ఎత్తున నిరసనలు వ్యక్తమయ్యాయి. ఆగస్టు 1న పాఠశాల మరుగుదొడ్లను శుభ్రం చేసేందుకు 23 ఏళ్ల అక్షయ్ షిండేను కాంట్రాక్ట్ ప్రాతిపదికన నియమించుకుంది. నిందితుడిని ఆగస్టు 17న అరెస్టు చేశారు. బాంబే హైకోర్టు సెప్టెంబర్ 3న పోలీసులను బలమైన కేసు పెట్టాలని, ప్రజల ఒత్తిడితో తొందరపడి చార్జిషీట్ దాఖలు చేయవద్దని కోరింది.