'నాకు ఆత్మాహుతి బాంబు ఇవ్వండి.. పాక్‌పై దాడి చేస్తా'.. మంత్రి అహ్మద్‌ ఖాన్‌ సంచలన వ్యాఖ్యలు

పహల్గామ్ ఉగ్రవాద దాడి తర్వాత భారతదేశం, పాకిస్తాన్ మధ్య ఉద్రిక్తత కొనసాగుతోంది. ఇదిలా ఉండగా కర్ణాటక మైనారిటీ శాఖ మంత్రి జమీర్ అహ్మద్ ఖాన్ పొరుగు దేశంపై యుద్ధం చేయడానికి ఆత్మాహుతి బాంబుతో పాకిస్తాన్‌కు పంపాలని డిమాండ్ చేసిన వీడియో.. ఇప్పుడు వైరల్‌గా మారింది. శుక్రవారం విలేకరుల సమావేశంలో అహ్మద్‌ ఖాన్ మాట్లాడుతూ.. పాకిస్తాన్ ఎల్లప్పుడూ భారతదేశానికి శత్రువు అని, ప్రధానమంత్రి నరేంద్ర మోడీ, కేంద్ర హోంమంత్రి అమిత్ షా అనుమతిస్తే, యుద్ధంలో చేరడానికి సిద్ధంగా ఉన్నానని అన్నారు.

కర్ణాటక మంత్రి జమీర్ అహ్మద్ ఖాన్ మాట్లాడుతూ.. 'మేము భారతీయులం, మేము హిందుస్తానీలం. పాకిస్తాన్‌తో మనకు ఎప్పుడూ ఎలాంటి సంబంధం లేదు. పాకిస్తాన్ ఎప్పుడూ మనకు శత్రువు.. మోడీ, అమిత్ షా, కేంద్ర ప్రభుత్వం నన్ను అనుమతిస్తే, నేను పాకిస్తాన్ వెళ్లి యుద్ధం చేయడానికి సిద్ధంగా ఉన్నాను. ప్రధాని మోడీ, అమిత్ షా లను తనకు ఆత్మాహుతి బాంబు ఇవ్వాలని, దానిని తన శరీరానికి కట్టుకుని పాకిస్తాన్ వెళ్లి వారిపై దాడి చేస్తాను' అని అడిగాడు.

జమీర్ అహ్మద్ ఖాన్, 'యుద్ధం వస్తే, నేను సిద్ధంగా ఉన్నాను' అని అన్నాడు. ఒక మంత్రిగా, నేను పాకిస్తాన్‌తో యుద్ధం చేయడానికి సిద్ధంగా ఉన్నానని చెబుతున్నాను. భారతదేశం తరపున యుద్ధంలో పాల్గొనడానికి నేనే అక్కడికి వెళ్తాను. అవసరమైతే, నేను ఆత్మాహుతి బాంబర్ కూడా అవుతాను. నేను తమాషా చేయడం లేదు. దేశం కోసం, మోడీ, షా నన్ను ఆత్మాహుతి బాంబర్‌గా చేస్తే, నేను బాంబు ధరించి పాకిస్తాన్‌కు వెళ్తానని అల్లాహ్‌తో ప్రమాణం చేస్తున్నాను. జమ్మూ కాశ్మీర్‌లోని పహల్గామ్‌లో జరిగిన ఉగ్రవాద దాడిని కర్ణాటక మంత్రి తీవ్రంగా ఖండించారు, ఇది అమాయక పౌరులపై జరిగిన హేయమైన, అమానవీయ చర్య అని అభివర్ణించారు.

పహల్గామ్ ఉగ్రవాద దాడికి నిరసనగా ప్రతి భారతీయుడు ఐక్యంగా ఉండాలని ఆయన విజ్ఞప్తి చేశారు. జాతీయ భద్రత కోసం కఠినమైన చర్యలు తీసుకోవాలని కేంద్రాన్ని కోరారు. ఏప్రిల్ 22న జమ్మూ కాశ్మీర్‌లోని పహల్గామ్‌లో పాకిస్తాన్ మద్దతుగల ఉగ్రవాదులు 26 మంది పర్యాటకులను కాల్చి చంపారు. లష్కరే తోయిబాతో సంబంధం ఉన్న రెసిస్టెన్స్ ఫ్రంట్ (TRF) ఈ దాడికి బాధ్యత వహించింది. దాడి నుండి బయటపడిన పర్యాటకులు, ఉగ్రవాదులు ప్రజలను వారి మతం గురించి అడిగారని, కల్మా పారాయణం చేయమని చెప్పారని, అలా చేయలేని వారిని కాల్చి చంపారని పేర్కొన్నారు.