ఒకే కులాన్ని రెండు వేర్వేరు రిజర్వేషన్ వర్గాల కింద ఉంచలేము : హై కోర్టు

విద్య, ఉపాధి కోసం ఒకే కులాన్ని రెండు వేర్వేరు రిజర్వేషన్ వర్గాల కింద ఉంచలేమని కర్ణాటక హైకోర్టు తీర్పు ఇచ్చింది. మైసూరు జిల్లాలోని కొల్లేగల్ తాలూకా నివాసి వి. సుమిత్ర దాఖలు చేసిన పిటిషన్‌కు ప్రతిస్పందనగా ఈ తీర్పు వచ్చింది.

జస్టిస్ సూరజ్ గోవిందరాజ్ ఇటీవల తీర్పు వెలువరిస్తూ, విద్యా, ఉపాధి ప్రయోజనాల కోసం బాలాజీగ/బనాజిగ కమ్యూనిటీని గ్రూప్ 'బి' కింద ఏకరీతిలో వర్గీకరించాలని కర్ణాటక ప్రభుత్వాన్ని ఆదేశించారు. విద్య కోసం గ్రూప్ 'బి' కింద (ఆర్టికల్ 15(4) కింద), ఉపాధి కోసం గ్రూప్ 'డి' కింద (ఆర్టికల్ 16(4) కింద) కమ్యూనిటీని ఉంచే రాష్ట్ర ప్రభుత్వ నిర్ణయం రాజ్యాంగ విరుద్ధమని కోర్టు అభిప్రాయపడింది.

తన కులం గ్రూప్ 'బి'కి చెందినదని సుమిత్ర 1993లో ఓబీసీ కోటా కింద ప్రాథమిక పాఠశాల ఉపాధ్యాయురాలిగా నియమితులయ్యారు. అయితే 1996లో, ఉద్యోగం కోసం తన కమ్యూనిటీని గ్రూప్ 'డి' కింద వర్గీకరించారని, ఉద్యోగ సంబంధిత రిజర్వేషన్లకు ఆమె కుల ధృవీకరణ పత్రం చెల్లదని పేర్కొంటూ ఆమెకు నోటీసు అందింది.

డిపార్ట్‌మెంటల్ అప్పీళ్లు, కర్ణాటక అడ్మినిస్ట్రేటివ్ ట్రిబ్యునల్ ద్వారా పరిష్కారానికి చేసిన అనేక ప్రయత్నాలు విఫలమైన తర్వాత, సుమిత్ర ఈ ద్వంద్వ వర్గీకరణను చూపించే 1986 ప్రభుత్వ నోటిఫికేషన్‌ను కనుగొన్నారు. దీంతో ఆమె రాష్ట్ర వర్గీకరణను సవాలు చేసింది. ఎట్టకేలకు విజయాన్ని అందుకుంది.