ఇన్‌కమ్‌ ట్యాక్స్‌ బిల్లును వెనక్కితీసుకున్న కేంద్రం.. కొత్త వెర్షన్ ఎప్పుడంటే.?

ఆదాయపు పన్ను బిల్లు 2025ని కేంద్ర ప్రభుత్వం లోక్‌సభ నుంచి ఉపసంహరించుకుంది. బిల్లును పరిశీలించేందుకు ఏర్పాటైన సెలెక్ట్ కమిటీ నివేదిక తర్వాత ఈ నిర్ణయం తీసుకున్నారు. ఈ బిల్లును ఫిబ్రవరిలో లోక్‌సభలో ప్రవేశపెట్టారు. కొత్త బిల్లును ఆగస్టు 11న లోక్‌సభలో ప్రవేశపెట్టనున్నట్లు సమాచారం.

కేంద్ర ప్రభుత్వం 13 ఫిబ్రవరి 2025న లోక్‌సభలో ఆదాయపు పన్ను బిల్లు 2025ను ప్రవేశపెట్టింది. బిల్లును పరిశీలించడానికి బీజేపీ ఎంపీ బైజయంత్ పాండా అధ్యక్షతన 31 మంది సభ్యులతో కూడిన ఎంపిక కమిటీని ఏర్పాటు చేశారు. కమిటీ బిల్లును పరిశీలించి 285 సూచనలు చేసింది. కమిటీ తన నివేదికను 21 జూలై 2025న లోక్‌సభలో సమర్పించింది. సెలెక్ట్ కమిటీ చేసిన దాదాపు అన్ని సిఫార్సులను కేంద్ర ప్రభుత్వం ఆమోదించింది. సరైన శాసన అర్థాన్ని అందించడానికి చేర్చవలసిన కొన్ని సూచనలు కూడా స్వీకరించబడ్డాయి.

ఆర్థిక మంత్రి నిర్మలా సీతారామన్ శుక్రవారం లోక్‌సభలో ఆదాయపు పన్ను బిల్లు, 2025ను ఉపసంహరించుకున్నారు. సెలెక్ట్ కమిటీ సూచించిన మార్పులను పొందుపరిచి కొత్త రూపంలో ప్రభుత్వం బిల్లును తీసుకువస్తుందని తెలిపారు. కొత్త వెర్షన్ బిల్లును ఆగస్టు 11న లోక్‌సభలో ప్రవేశపెట్టనున్నట్లు సమాచారం.