ఎమ్మెల్యేను కొట్టిన భర్త

పంజాబ్‌లోని ఆమ్ ఆద్మీ పార్టీ (AAP) ఎమ్మెల్యేను ఆమె భర్త బహిరంగంగా కొట్టిన వీడియో సోషల్ మీడియాలో వైరల్ అవుతోంది. ఈ పని చేసిన ఆమె భర్తపై చర్యలు తీసుకోవాలని పలువురు డిమాండ్ చేస్తున్నారు. పంజాబ్ ఎమ్మెల్యే బల్జీందర్ కౌర్‌ను ఆమె భర్త, ఆప్ నాయకుడు ఇంట్లో కొట్టినట్లు వీడియో చూపిస్తుంది. భర్త సుఖ్‌రాజ్ సింగ్, ఆవేశంతో ఒక్కసారిగా కౌర్‌ను కొట్టాడు. చాలా మంది వ్యక్తుల సమక్షంలో ఇద్దరూ వాదించుకోవడం కనిపిస్తుంది. ఈ ఘటన జరిగిన తర్వాత అతడిని ఇతరులు ఈడ్చుకెళ్లారు. ఈ ఘటన తల్వండి సాబోలోని దంపతుల ఇంటికి సమీపంలో ఉన్న సీసీటీవీ కెమెరాలో రికార్డైంది.

50 సెకన్ల వీడియో జూలై 10 నాటిది.. ఇప్పుడు బయటపడింది. పంజాబ్‌ను పాలించే ఆప్ ఈ క్లిప్‌పై ఎటువంటి వ్యాఖ్యలు చేయలేదు. బల్జిందర్ కౌర్ తల్వాండి సబో నుండి రెండుసార్లు ఎమ్మెల్యేగా ఉన్నారు. ఈ ఘటనపై ఆమె ఫిర్యాదు చేయలేదు. కానీ పంజాబ్ రాష్ట్ర మహిళా కమిషన్ మాత్రం తీవ్ర విమర్శలు చేస్తోంది. కమిషన్ చైర్‌పర్సన్ మనీషా గులాటీ విలేకరులతో మాట్లాడుతూ "నేను సోషల్ మీడియాలో బల్జీందర్ కౌర్ వీడియోను చూశాను. ఈ సంఘటనపై మేము సుమోటో నోటీసు తీసుకుంటాము. ప్రజా సమస్యలను లేవనెత్తే మహిళకు ఇంట్లో వేధింపులు జరగడం చాలా బాధను కలిగిస్తోంది" అని అన్నారు.

కౌర్ 2019లో AAP మజా ప్రాంతానికి యువజన విభాగం కన్వీనర్ అయిన సుఖ్‌రాజ్ సింగ్‌ను వివాహం చేసుకున్నారు. ఆమె AAP జాతీయ కార్యవర్గంలో సభ్యురాలు. పంజాబ్‌లో పార్టీ మహిళా విభాగానికి నాయకత్వం వహిస్తున్నారు. ఆమె రాజకీయాల్లోకి రాకముందు ఫతేఘర్ సాహిబ్‌లోని మాతా గుజ్రీ కాలేజీలో ఇంగ్లీష్ ప్రొఫెసర్‌గా పనిచేశారు. ఆమె ఆప్‌లో చేరి 2017లో పంజాబ్‌లో మొదటిసారి ఎన్నికల్లో గెలిచారు.