కేజ్రీవాల్‌కు ద‌క్క‌ని ఊర‌ట
ఢిల్లీ ఎక్సైజ్ పాలసీ మనీలాండరింగ్ కేసులో బెయిల్ అంశంపై అత్యవసర విచారణ జరపాలన్న అరవింద్ కేజ్రీవాల్ అభ్యర్థనను హైకోర్టు బుధవారం తోసిపుచ్చింది
By Medi Samrat Published on 10 July 2024 1:00 PM GMT
ఢిల్లీ ఎక్సైజ్ పాలసీ మనీలాండరింగ్ కేసులో బెయిల్ అంశంపై అత్యవసర విచారణ జరపాలన్న అరవింద్ కేజ్రీవాల్ అభ్యర్థనను హైకోర్టు బుధవారం తోసిపుచ్చింది. ట్రయల్ కోర్టు బెయిల్ ఆర్డర్‌ను సవాల్ చేస్తూ ఎన్‌ఫోర్స్‌మెంట్ డైరెక్టరేట్ (ఈడీ) హైకోర్టును ఆశ్రయించడంతో.. ట్రయల్ కోర్టు కేజ్రీవాల్‌కు మంజూరు చేసిన బెయిల్‌పై హైకోర్టు గతంలో స్టే విధించింది.
ఈడీ పిటిషన్‌పై కేజ్రీవాల్ ఇచ్చిన సమాధానం అర్థరాత్రి తనకు అందిందని.. దానిపై కౌంటర్ అఫిడవిట్ దాఖలు చేయాల్సిందిగా ఈడీని కోరామని అడిషనల్‌ సొలిసిటర్‌ జనరల్‌ (ఏఎస్‌జీ) ఎస్‌వీ రాజు చెప్పడంతో హైకోర్టు న్యాయమూర్తి జస్టిస్‌ నీనా బన్సల్‌ కృష్ణ కేసు విచారణను ఈరోజు వాయిదా వేశారు. సమయం కావాలి. కౌంటర్ కాపీని మంగళవారం రాత్రి 11 గంటలకు తనకు అందజేశారని.. కౌంటర్ అఫిడవిట్ సిద్ధం చేసి దాఖలు చేయడానికి సమయం లేదని రాజు చెప్పారు.
కేజ్రీవాల్ తరఫున సీనియర్‌ న్యాయవాది డాక్టర్‌ అభిషేక్‌ మను సింఘ్వీ ఈడీ వాదనను సవాలు చేశారు. మంగళవారం మధ్యాహ్నం ఒంటి గంటకు ఈ ప్రత్యుత్తర కాపీని ఇన్వెస్టిగేషన్ ఆఫీస్ (ఐఓ)కి పంపినట్లు సింఘ్వీ తెలిపారు. కేజ్రీవాల్‌కు ఇచ్చిన బెయిల్‌పై హైకోర్టు స్టే విధించినందున ఈ విషయంలో చాలా అత్యవసరం ఉందని సింఘ్వీ అన్నారు.
ఈడీ కౌంటర్ అఫిడవిట్‌పై ఆధారపడకుండా కేసును వాదించేందుకు సిద్ధంగా ఉన్నానని చెప్పారు. అయితే కేజ్రీవాల్ సమాధానానికి కౌంటర్ అఫిడవిట్ దాఖలు చేసేందుకు ఈడీకి అర్హత ఉందని జస్టిస్‌ కృష్ణ వ్యాఖ్యానించారు. దీంతో కేసు విచారణను జూలై 15కి వాయిదా వేసింది.
