'మోనాలిసా'కు సినిమా ఆఫర్ ప్ర‌క‌టించాడు.. మ‌రో అమ్మాయిని అవ‌కాశం పేరుతో మోసం చేశాడు..!

మహా కుంభమేళాలో వైరల్ అయిన‌ అమ్మాయి మోనాలిసాకు సినిమా ఆఫర్ చేసిన దర్శకుడు సనోజ్ మిశ్రాను ఢిల్లీ పోలీసులు అరెస్ట్ చేశారు. తన సినిమాలో మోనాలిసాకు ఓ పాత్రను ఆఫర్ చేసిన దర్శకుడు సనోజ్ మిశ్రా అత్యాచారం కేసులో అరెస్టయ్యాడని తెలుస్తుంది. ఆయన బెయిల్ పిటిషన్‌ను ఢిల్లీ హైకోర్టు తిరస్కరించడంతో అరెస్టు జరిగింది. దర్శకుడు తనను కొన్నాళ్లుగా శారీరకంగా దోపిడికి గురిచేస్తున్నాడని ఓ మహిళ ఆరోపించింది.

గత ఏడాది మార్చి 30న 45 ఏళ్ల సనోజ్ మిశ్రాను ఘజియాబాద్‌లో ఢిల్లీ పోలీసులు అరెస్టు చేశారు, ఆ తర్వాత నబీ కరీం పోలీసులు అతనిని కస్టడీలో ఉంచారు. నాలుగేళ్లుగా దర్శకుడు తనపై అత్యాచారం చేశాడని 28 ఏళ్ల యువతి ఆరోపించింది. ఔత్సాహిక సినీ నటి అయిన మహిళ.. తాను ముంబైలో మిశ్రాతో లివ్ ఇన్ రిలేషన్ షిప్ లో ఉన్నట్లు పేర్కొంది. బాధితురాలి ప్రకారం.. లైంగిక దోపిడీ సమయంలో దర్శకుడు ఆమెను మూడుసార్లు అబార్షన్ చేయించుకోమని బలవంతం చేశాడు.

సనోజ్ మిశ్రా మొదట పెళ్లి చేసుకుంటాన‌ని హామీ ఇచ్చి తనతో శారీరక సంబంధాలు పెట్టుకున్నాడని బాధితురాలు పోలీసులకు ఇచ్చిన వాంగ్మూలంలో పేర్కొంది. ఆ తర్వాత సినిమాల్లో నటించమని ప్రలోభపెట్టి, బెదిరించి మౌనంగా ఉండమన్నాడు. ఆ తర్వాత పెళ్లి చేసుకుంటానని చెప్పి మాట త‌ప్పాడు. ఢిల్లీ పోలీసులు తెలిపిన వివరాల ప్రకారం.. ఈ కేసులో దర్శకుడిపై 2024 మార్చి 6న అత్యాచారం, దాడి, అబార్షన్ చేయించడం, బెదిరించడం వంటి అనేక సెక్షన్ల కింద ఎఫ్‌ఐఆర్ నమోదు చేశారు.

దర్శకుడు సనోజ్ మిశ్రా ఆ మహిళతో శారీరక సంబంధం పెట్టుకుని, ఆ తర్వాత ఆమెను విడిచిపెట్టినట్లు ఆరోపణలు వచ్చాయి. పోలీసులకు ఫిర్యాదు చేస్తే ప్రైవేట్‌ వీడియోలు, ఫొటోలను సోషల్ మీడియాలో వైరల్ చేస్తానని బెదిరించాడు. అనంతరం బాధితురాలు ఫిర్యాదు చేసింది. ఈ కేసును ఇప్పటికే విచారిస్తున్న ఢిల్లీ హైకోర్టు మిశ్రా బెయిల్ పిటిషన్‌ను తిరస్కరించింది. ఆ తర్వాత అతన్ని అరెస్టు చేసింది.

'మహాకుంభ్ 2025' సమయంలో వైరల్ అయిన మోనాలిసాకు సనోజ్ మిశ్రా తన సినిమాలో ఆఫర్ చేశాడు. ఈ ప్రకటన తర్వాత ఆయన వెలుగులోకి వచ్చారు. ఇప్పటికే దర్శకుడిపై వచ్చిన ఆరోపణలపై సోషల్ మీడియాలో పెద్దఎత్తున విమర్శలు వెల్లువెత్తాయి.