పీఎస్‌ఎల్‌వీ రాకెట్‌ ప్రయోగానికి కౌంట్‌డౌన్‌ ప్రారంభం

భారత అంతరిక్ష పరిశోధనా సంస్థ (ఇస్రో) మరో ప్రయోగానికి రెడీ అయ్యింది. తిరుపతి జిల్లాలోని సతీష్ ధావన్ అంతరిక్ష కేంద్రంలోని మొదటి లాంచ్ ప్యాడ్ నుండి పీఎస్‌ఎల్‌వీ సీ54 ఉపగ్రహ వాహకనౌక ప్రయోగం కోసం కౌంట్‌డౌన్ ప్రారంభమైంది. శుక్రవారం ఉదయం 10.26 గంటలకు కౌంట్‌డౌన్‌ ప్రారంభం అయ్యింది. 25.30 గంటల కౌంట్ డౌన్ కొనసాగిన తర్వాత శనివారం ఉదయం 11.56 గంటలకు పీఎస్ ఎల్ వీ సీ54 రాకెట్ అంతరిక్షంలోకి దూసుకెళ్లనుంది.

ఈ ప్రయోగానికి సంబంధించి గురువారం షార్‌లోని బ్రహ్మ ప్రకాష్‌ హాలులో ఎంఆర్‌ఆర్‌ కమిటీ చైర్మన్‌ బిఎన్‌ సురేష్‌ అధ్యక్షతన మిషన్‌ రెడీనెస్‌ రివ్యూ (ఎంఆర్‌ఆర్‌) సమావేశం జరిగింది. ల్యాబ్ చైర్మన్ ఆర్ముగం రాజరాజన్ నేతృత్వంలో రాకెట్‌ను పరిశీలించి చివరి దశగా ప్రయోగ రిహార్సల్స్ నిర్వహించారు. అనంతరం శుక్రవారం ఉదయం 10.26 గంటలకు కౌంట్ డౌన్ సమయాన్ని అధికారికంగా ప్రకటించగా, ప్రయోగ సమయం శనివారం ఉదయం 11.56 గంటలకు ప్రారంభంకానుంది. ఈ ప్రయోగం ద్వారా తొమ్మిది ఉపగ్రహాలను కక్ష్యలోకి పంపనున్నారు. ఇందులో ఇస్రో యొక్క EOS-06 ఉపగ్రహం, ఎనిమిది ఉపగ్రహాలు వాణిజ్యపరంగా ఉన్నాయి.

నానో ఉపగ్రహాల జాబితాలో భారత్‌, భూటాన్‌ సంయుక్తంగా రూపొందించిన భూటాన్‌ శాట్‌, పిక్సెల్‌ సంస్థ తయారు చేసిన ఆనంద్‌ శాట్‌, ధ్రువ స్పేస్‌ సంస్థ రూపొందించిన రెండు థైబోల్ట్ శాట్‌లు, అలాగే అమెరికాకు చెందిన స్పేస్‌ ఫ్లైట్‌ సంస్థకు చెందిన నాలుగు అస్ట్రోకాస్ట్‌ ఉపగ్రహాలు ఉన్నాయి.

శుక్రవారం ఉదయం 10.26 గంటలకు కౌంట్ డౌన్ ప్రారంభమైంది. రాకెట్ నాలుగో దశ, రెండో దశ ద్రవ ఇంధనంతో నింపనున్నారు. షార్ నుంచి ఇది 87వ ప్రయోగం. రాకెట్ సిరీస్‌లో పీఎస్‌ఎల్‌వీ 56వ ప్రయోగం. PSLV XL వెర్షన్ 24వ ప్రయోగం. ఇస్రో చైర్మన్ ఎస్.సోమ్‌నాథ్ శుక్రవారం బెంగళూరు అంతరిక్ష కేంద్రం ప్రధాన కార్యాలయం నుంచి శ్రీహరికోటకు చేరుకోనున్నారు. తదుపరి తనిఖీలు నిర్వహించడం ద్వారా పిఎస్‌ఎల్‌వి సి54 రాకెట్‌కు సంబంధించిన కౌంట్‌డౌన్‌ను ఆయన స్వయంగా పర్యవేక్షిస్తారు.