Bihar Results : బీహార్ ఎన్నికల ఫ‌లితాల్లో సత్తా చాటిన యువనేత

బీహార్ అసెంబ్లీ ఎన్నికల కౌంటింగ్ ప్ర‌స్తుత‌ ట్రెండ్స్ ప్ర‌కారం.. NDA అఖండ మెజారిటీతో ప్రభుత్వాన్ని ఏర్పాటు చేయనున్నట్లు తెలుస్తోంది. ఈ ఎన్నికలు జేడీయూ అధినేత నితీష్‌ కుమార్‌, ప్రధాని నరేంద్ర మోదీల శక్తివంతమైన జోడీకి గుర్తుగా నిల‌వ‌నున్నాయి. అయితే ఈ ఎన్నికల్లో ఓ యువ నేత కూడా తన సత్తా చాటారు. ఆ పేరు చిరాగ్ పాశ్వాన్. NDAలో తన లోక్ జనశక్తి పార్టీ (రామ్ విలాస్)కి 29 సీట్లు వచ్చేలా కృషి చేసిన చిరాగ్ పాశ్వాన్.. చాలా స్థానాల్లో ఆధిక్యం సాధించి తన సామర్థ్యాన్ని నిరూపించుకున్నాడు. ప్రస్తుతం ఆయన పార్టీ స్ట్రైక్ రేట్ దాదాపు 72% ఉంది.

చిరాగ్ పార్టీ గత సంవత్సరం లోక్‌సభ ఎన్నికలలో కూడా అద్భుతంగా రాణించింది. లోక్‌సభలో పోటీ చేసిన మొత్తం ఐదు స్థానాల్లో ఎల్‌జేపీఆర్‌ విజయం సాధించింది. 2020లో JDU చీఫ్ నితీష్ కుమార్‌తో విభేదాల కారణంగా అప్పటి ఐక్య LJP స్వతంత్రంగా ఎన్నికలలో పోటీ చేసింది. అప్పుడు పోటీ చేసిన 130 సీట్లలో కేవ‌లం ఒక‌టి మాత్రమే గెలుచుకోగలిగింది. పార్టీ మంచి ఓట్ షేర్ సాధించి.. అనేక స్థానాల్లో JDUని కలవరపెట్టినప్పటికీ.. చిరాగ్‌కు తన తండ్రి రామ్‌విలాస్ పాశ్వాన్ వారసత్వాన్ని ముందుకు తీసుకెళ్లే చరిష్మా, రాజకీయ చతురత లేదని చాలా మంది రాజకీయ విశ్లేషకులు తీసిపారేశారు.

మరోవైపు 2021లో చిరాగ్‌కు పరిస్థితులు మరింత దిగజారాయి, అతని మామ పశుపతి కుమార్ పరాస్.. రామ్ విలాస్ పాశ్వాన్ వారసత్వాన్ని స్వాధీనం చేసుకోవడానికి ప్రయత్నించారు. పార్టీ నుంచి చీలిపోయారు. అప్ప‌టినుంచి చిరాగ్ పోరాటం మొదలైంది. 43 సంవత్సరాల వయస్సులో చిరాగ్ యువ నాయకుడిగా స్థిరపడ్డాడు. తనను తాను 'యువ బిహారీ' అని పిలుచుకుంటూ దళితుల ప్రయోజనాలను పరిరక్షించే తన పార్టీ మూలాలతో ముడిపడి ఉన్నాడు.

2024 లోక్‌సభ ఎన్నికలలో చిరాగ్, అతని కూట‌మి పార్టీల కృషి ఫలించింది, పార్టీ పోటీ చేసిన మొత్తం ఐదు స్థానాలను గెలుచుకుంది. 100% స్ట్రైక్ రేట్‌తో బలీయమైన రాజకీయ పార్టీగా ఎల్‌జేపీఆర్‌ స్థిరపడింది. ఇప్పుడు చిరాగ్ విజయం దిశగా సాగుతున్న తీరు చూస్తుంటే.. కొత్త ప్రభుత్వంలో ఆయన పార్టీకి ప్రాముఖ్యత లభించే అవకాశం ఉందని స్పష్టమవుతోంది.