తప్పుడు సమాచారాన్ని ప్రచురిస్తోన్న.. చైనా పత్రికలపై భారత్‌ నిషేధం

ఢిల్లీ, ఇస్లామాబాద్ మధ్య ఉద్రిక్తతలు పెరుగుతున్న నేపథ్యంలో పాకిస్తాన్ ప్రచారాన్ని, ధృవీకరించని సమాచారాన్ని వ్యాప్తి చేస్తోందని ఆరోపిస్తూ చైనా ప్రభుత్వ యాజమాన్యంలోని జిన్హువా న్యూస్ ఏజెన్సీ, గ్లోబల్ టైమ్స్ సంస్థలను మైక్రోబ్లాగింగ్ సైట్ ఎక్స్‌లో భారత్ బుధవారం నిషేధించింది. ధృవీకరించని వాస్తవాలను పోస్ట్ చేయవద్దని, సోషల్ మీడియాలో తప్పుడు సమాచారాన్ని వ్యాప్తి చేయవద్దని చైనాలోని భారత రాయబార కార్యాలయం స్థానిక మీడియా సంస్థలను హెచ్చరించిన కొన్ని రోజుల తర్వాత ఈ పరిణామం జరిగింది.

ఆపరేషన్ సింధూర్ తర్వాత ఇస్లామాబాద్ మూడు ఫైటర్ జెట్లను కూల్చివేసిందని పాకిస్తాన్ సైనిక వర్గాలను ఉటంకిస్తూ, గత వారం గ్లోబల్ టైమ్స్ నివేదించిన సమయంలో భారతదేశం "వాస్తవాలను ధృవీకరించాలని" కోరింది. "మీడియా సంస్థలు మూలాలను ధృవీకరించకుండా అటువంటి సమాచారాన్ని పంచుకున్నప్పుడు, అది బాధ్యత, పాత్రికేయ నీతిలో తీవ్రమైన లోపాన్ని ప్రతిబింబిస్తుంది" అని రాయబార కార్యాలయం ట్వీట్ చేసింది.

తదుపరి పోస్ట్‌లో రాయబార కార్యాలయం "పాకిస్తాన్ అనుకూల హ్యాండిల్స్".. ఆపరేషన్ సింధూర్‌పై నిరాధారమైన వాదనలను వ్యాప్తి చేస్తున్నాయని, ప్రజలను తప్పుదారి పట్టించడానికి ప్రయత్నిస్తున్నాయని" ఆరోపించింది. జిన్హువా, గ్లోబల్ టైమ్స్ రెండూ చైనీస్ కమ్యూనిస్ట్ పార్టీకి మౌత్ పీస్ లు.