బాంబు బెదిరింపులు.. ఢిల్లీలోని 20 పాఠశాలల్లో భయానక వాతావరణం
దేశ రాజధాని ఢిల్లీలోని పాఠశాలలకు బాంబు బెదిరింపులు ఆగడం లేదు.
By Medi Samrat
దేశ రాజధాని ఢిల్లీలోని పాఠశాలలకు బాంబు బెదిరింపులు ఆగడం లేదు. ఈరోజు (శుక్రవారం) కూడా మళ్లీ దాదాపు 20 పాఠశాలలకు బెదిరింపు ఈ-మెయిల్స్ వచ్చాయి. పశ్చిమ్ విహార్ ప్రాంతంలో ఉన్న రిచ్‌మండ్ గ్లోబల్ స్కూల్‌కు బాంబు బెదిరింపు వచ్చినట్లు తెలిసింది. అదే సమయంలో రోహిణి సెక్టార్-3లో ఉన్న అభినవ్ పబ్లిక్ స్కూల్‌కు కూడా బాంబు బెదిరింపు వచ్చింది. బాంబు బెదిరింపుతో అన్ని పాఠశాలల్లో భయానక వాతావరణం నెలకొంది.
పాఠశాలల్లో బాంబుల గురించి గుర్తుతెలియని వ్యక్తి ఈ-మెయిల్ ద్వారా సమాచారం ఇచ్చాడని చెబుతున్నారు. అనంతరం పోలీసులు, అగ్నిమాపక శాఖకు చెందిన ఒక్కో వాహనం ఘటనా స్థలానికి చేరుకుంది. శుక్రవారం ఉదయం 8 గంటలకు రోహిణి సెక్టార్-3లోని అభినవ్ పబ్లిక్ స్కూల్‌లో బాంబు గురించి సమాచారం అందిందని, రోహిణి సెక్టార్-24లోని సవర్న్ స్కూల్ గురించి ఉదయం 8:16 గంటలకు సమాచారం అందిందని అగ్నిమాపక శాఖ తెలిపింది. ప్రస్తుతం అన్ని పాఠశాలల్లో సోదాలు కొనసాగుతున్నాయి.
