గోల్డ్ స్మగ్లింగ్ కేసులో నటి రన్యారావుపై బీజేపీ ఎమ్మెల్యే అసభ్యకర కామెంట్స్

బంగారం స్మగ్లింగ్ కేసులో అరెస్టయిన కన్నడ నటి రన్యారావుపై కర్ణాటక బీజేపీ ఎమ్మెల్యే బసనగౌడ పాటిల్ అసభ్యకర వ్యాఖ్యలు చేశారు. ఆమె శరీరంలోని అంగాంగంలో ప్రతీ చోట బంగారం దాచిపెట్టుకుని స్మగ్లింగ్ చేసిందని ఆరోపించారు. ఈ వ్యవహారంలో రాష్ట్ర మంత్రులకు ప్రమేయముందని ఆ మంత్రుల పేర్లను అసెంబ్లీ సమావేశాల్లో వెల్లడిస్తానని చెప్పారు.

"ఈ కేసులో ప్రమేయం ఉన్న మంత్రులందరి పేర్లను అసెంబ్లీ సమావేశంలో ప్రకటిస్తాను. ఆమె సంబంధాలు, ఆమెకు భద్రత పొందడానికి ఎవరు సహాయం చేశారు, బంగారాన్ని ఎలా తీసుకువచ్చారు అనే దాని గురించి నేను పూర్తి సమాచారాన్ని సేకరించాను. ఆమె బంగారాన్ని ఎక్కడ దాచిపెట్టింది, ఎలా అక్రమంగా రవాణా చేసింది అనే దానితో సహా అన్నింటినీ నేను సెషన్‌లో బయటపెడతాను" అని ఎమ్మెల్యే తెలిపారు.

కాగా నటి రన్యా రావును మార్చి 3న బెంగళూరు విమానాశ్రయంలో దుబాయ్ నుంచి తిరిగి వస్తుండగా రూ.12.56 కోట్ల విలువైన 14.2 కిలోల బంగారంతో అరెస్టు చేశారు . ఆ తర్వాత ఆమె నివాసంపై జరిపిన దాడిలో రూ.2.06 కోట్ల విలువైన బంగారు ఆభరణాలు, రూ.2.67 కోట్ల నగదు స్వాధీనం చేసుకున్నారు. అప్పటి నుండి ఆమెను అరెస్టు చేసి కస్టడీలో ఉంచారు, ఆమె బెయిల్ కోసం పిటిషన్ దాఖలు చేయగా కోర్టు తిరస్కరించింది.