సంభాల్‌లో ఉద్రిక్తత.. బీజేపీ అభ్యర్థి వాహనం ధ్వంసం

ఉత్తరప్రదేశ్‌లోని సంభాల్ జిల్లాలో అస్మోలీ అసెంబ్లీ స్థానం నుంచి బీజేపీ అభ్యర్థి హరేంద్ర అలియాస్ రింకూ వాహనంపై దాడి జరిగింది. అతడి వాహనాన్ని నిరసన కారులు ధ్వంసం చేశారు. దీంతో ఆ ప్రాంతంలో ఉద్రిక్త పరిస్థితులు నెలకొన్నాయి. కాగా బీజేపీ అభ్యర్థి, అతని మద్దతుదారులు పోలీస్ స్టేషన్‌లో తలదాచుకున్నారు. ఘటనా స్థలం నుంచి ఇద్దరు వ్యక్తులను పోలీసులు అదుపులోకి తీసుకున్నారు. ఈ దాడిలో రింకూ కారు తీవ్రంగా ధ్వంసమైంది. ఉత్తరప్రదేశ్‌ రాష్ట్రంలో రెండో విడత అసెంబ్లీ ఎన్నికల పోలింగ్ జరుగుతున్న సమయంలో ఈ దాడి జరిగింది.

ఉదయం 11 గంటల వరకు 23.03 పోలింగ్‌ శాతం నమోదైంది. రెండో దశ ఎన్నికల్లో భాగంగా 9 జిల్లాల్లోని 55 అసెంబ్లీ స్థానాలకు ఎన్నికలు జరుగుతున్నాయి. సహరాన్‌పూర్, బిజ్నోర్, మొరాదాబాద్, సంభాల్, రాంపూర్, అమ్రోహా, బుదౌన్, బరేలీ, షాజహాన్‌పూర్‌లలో విస్తరించి ఉన్న స్థానాలతో ఈ దశలో 586 మంది అభ్యర్థులు బరిలో ఉన్నారు. 2017లో మొత్తం 55 సీట్లలో బీజేపీ 38, సమాజ్‌వాదీ పార్టీ 15, కాంగ్రెస్‌ రెండు స్థానాలు గెలుచుకున్నాయి. గత అసెంబ్లీ ఎన్నికల్లో ఎస్పీ, కాంగ్రెస్ కలిసి పోటీ చేశాయి.