గవర్నర్‌ను క‌ల‌వ‌నున్న‌ నితీష్ కుమార్.. కొత్త ప్రభుత్వం కొలువుదీరేది అప్పుడే..

బీహార్ ఎన్నికల రెండు దశల ఓటింగ్ ఫలితం వెలువడింది. ప్ర‌జ‌ల తీర్పు అధికార NDAకి అనుకూలంగా వ‌చ్చింది. ఎన్డీయే పార్టీలు 202 సీట్లు గెలుచుకున్నాయి. ప్రస్తుత అసెంబ్లీ పదవీకాలం నవంబర్ 22 వరకు ఉంది. 18వ అసెంబ్లీ ఆ రోజు లేదా అంతకు ముందు ఏర్పాటు చేయబడుతుంది. ఈ నేప‌థ్యంలోనే ముఖ్యమంత్రి నితీష్ కుమార్ శ‌నివారం గవర్నర్ ఆరిఫ్ మహ్మద్ ఖాన్‌ను కలిసి రాజీనామా చేసి, తదుపరి పదవీ ప్రమాణ స్వీకార తేదీని నిర్ణయించడం గురించి చర్చించే అవ‌కాశం ఉంది.

దీనికి ముందు.. 2010 అసెంబ్లీ ఎన్నికల్లోనూ ఎన్డీయే ఇలాంటి విజయాన్నే సాధించింది. ఇక ఈ ఎన్నిక‌ల్లో అసెంబ్లీ మాజీ స్పీకర్ అవధ్ బిహారీ చౌదరి సివాన్ నుంచి, ఉదయ్ నారాయణ్.. చౌదరి జిల్లాలోని సికంద్రా నుంచి ఓడిపోయారు. వీరిద్దరూ ఆర్జేడీ అభ్యర్థులు. సివాన్‌లో ఆరోగ్య మంత్రి, బీజేపీ అభ్యర్థి మంగళ్ పాండే విజయం సాధించారు. ఔరంగాబాద్ జిల్లా కుటుంబ నుంచి కాంగ్రెస్ రాష్ట్ర అధ్యక్షుడు రాజేష్ కుమార్ ఓడిపోయారు. ఆర్జేడీ అధ్యక్షుడు లాలూ ప్రసాద్ పెద్ద కుమారుడు తేజ్ ప్రతాప్ యాదవ్ మహువా అసెంబ్లీ నియోజకవర్గం నుంచి పోటీ చేసి ఓడిపోయారు.

అసెంబ్లీ ఎన్నికల ఫలితాలు పూర్తిగా ఎన్డీయేకు అనుకూలంగా వచ్చాయి. ఐదేళ్ల క్రితం ఎన్నికల ఫలితాలతో పోల్చితే జేడీయూ ఘన విజయం సాధించింది. మొత్తం 42 సీట్లను అధికంగా గెలుచుకుంది. 2020లో జేడీయూ 43 సీట్లు మాత్రమే గెలుచుకుంది. బీజేపీ కూడా 2020తో పోలిస్తే పార్టీ ఎమ్మెల్యేల సంఖ్య 15 సంఖ్య పెరిగింది. ఆర్జేడీ 50 సీట్లు కోల్పోయింది. వచ్చే వారంలోగా కొత్త ప్రభుత్వం ఏర్పాటయ్యే అవకాశం ఉంది.