అక్క‌డ‌ ప్లాప్‌.. అందుకే ప్లాన్-Bతో సిద్ధమవుతోన్న కేజ్రీవాల్‌

హర్యానా అసెంబ్లీ ఎన్నికల్లో ఓటమి తర్వాత ఢిల్లీ అసెంబ్లీ ఎన్నికల్లో విజయం సాధించేందుకు ఆమ్ ఆద్మీ పార్టీ (ఆప్) వ్యూహం మార్చనుంది. ఒక్కో అసెంబ్లీ సీటుపై ఆమ్ ఆద్మీ పార్టీ విడివిడిగా సమీక్ష నిర్వహించనుందని ఆ పార్టీ వర్గాలు తెలిపాయి. ప్రభుత్వ పనితీరుపై ప్రజల్లో ఎలాంటి చర్చ జరుగుతోందో.. ఢిల్లీ మాజీ ముఖ్యమంత్రి, ఆమ్‌ ఆద్మీ పార్టీ జాతీయ కన్వీనర్‌ అరవింద్‌ కేజ్రీవాల్‌, ఇతర నేతలకు జైలుశిక్ష విధించడం వల్ల పార్టీ ఇమేజ్‌పై ఎలాంటి ప్రభావం పడిందో ముందుగా అంచనా వేయనున్నారు. ఆ తర్వాత పార్టీలోని బలహీనతలను గుర్తించి తొలగిస్తామని పార్టీ వ‌ర్గాలు పేర్కొన్నాయి.

హర్యానా, జమ్మూకశ్మీర్‌లో ఇటీవల జరిగిన అసెంబ్లీ ఎన్నికల్లో ఆ పార్టీకి నిరాశే ఎదురైంది. హర్యానా ఎన్నికల్లో ఆప్ ఒక్క సీటు కూడా గెలవలేకపోయింది. జమ్మూ కాశ్మీర్‌లో ఒక్క సీటుతో సరిపెట్టుకోవాల్సి వచ్చింది. దీంతో రాబోయే ఢిల్లీ అసెంబ్లీ ఎన్నికలకు సంబంధించి కింది స్థాయిలో పార్టీ పరిస్థితిని అంచనా వేయాలని పార్టీ అగ్ర నాయకత్వం తమ‌ నేతలకు సందేశం ఇచ్చింది. ఢిల్లీలో అభివృద్ధి మందగమనంతో పాటు పార్టీ నేతల ఇమేజ్‌కి సంబంధించి సరైన పరిస్థితిని వెల్లడించడానికి, శ్రద్ధగల, కష్టపడి పనిచేసే, అట్టడుగు స్థాయి కార్యకర్తల ద్వారా ప‌రిస్థితిని అంచనా వేయాలని కూడా స్పష్టం చేసింది.

రాజకీయ నిపుణుల అభిప్రాయం ప్రకారం.. ఆమ్ ఆద్మీ పార్టీ అధినేత అరవింద్ కేజ్రీవాల్ పరిస్థితిని అంచనా వేయకుండా ఏ పనీ చేయరు. ఢిల్లీలో తమ పార్టీ అధికారంలోకి రాని ప్రమాదం ఏం లేదనే నమ్మకంతోనే కేజ్రీవాల్ ముఖ్యమంత్రి పదవికి రాజీనామా చేశారు.

అయితే.. ప్రజలకు మంచి ప‌థ‌కాలు అందించిన‌ రెండు ప్రభుత్వాలు.. రాజస్థాన్‌లో కాంగ్రెస్, తెలంగాణలో బీఆర్‌ఎస్‌ల‌ను గద్దె దిగ‌డం పట్ల ఆప్ ఖచ్చితంగా ఆందోళన చెందుతోంది. కానీ అక్కడి పరిస్థితులు, సమస్యలు వేరు. ఢిల్లీలో పరిస్థితి భిన్నంగా ఉంటుంది.

ఢిల్లీ కేంద్ర పాలిత ప్రాంతంగా ఉన్నప్పటికీ.. ప్రతి సంవత్సరం ఇతర రాష్ట్రాల నుండి కనీసం నాలుగు నుండి ఐదు లక్షల మంది ప్రజలు వచ్చే నగరం. వారిలో పేద వర్గానికి ఉచిత సౌకర్యాలు అవసరం. అటువంటి పరిస్థితిలో ఉచిత సౌకర్యాలు పొందేలా ఎల్లప్పుడూ ఆ పార్టీ ప్రభుత్వంలో ఉండాలని కోరుకుంటుంది. వీటిన్నింటిపై ఆప్ అగ్ర నేత‌లు చ‌ర్చిస్తున్నారు.