అరెస్టైన డాక్టర్ షాహీన్ గురించి వెలుగులోకి షాకింగ్ విషయాలు
దేశ రాజధాని ఢిల్లీలోని ఎర్రకోట సమీపంలో సోమవారం సాయంత్రం జరిగిన పేలుడు ఘటన తర్వాత తాజాగా మ‌రో పెద్ద విషయం వెలుగులోకి వచ్చింది.
By - Medi Samrat
దేశ రాజధాని ఢిల్లీలోని ఎర్రకోట సమీపంలో సోమవారం సాయంత్రం జరిగిన పేలుడు ఘటన తర్వాత తాజాగా మ‌రో పెద్ద విషయం వెలుగులోకి వచ్చింది. హర్యానాలోని ఫరీదాబాద్‌లో అరెస్టయిన జైష్ మహిళా విభాగం అధిపతి డాక్టర్ షాహీన్ గురించి షాకింగ్ విషయాలు వెల్లడయ్యాయి. డాక్టర్ షాహీన్ లక్నో నివాసి. అరెస్టయిన ఉగ్రవాది డాక్టర్ ముజమ్మిల్ స్నేహితురాలు కూడా. ఆమెను ఒకరోజు ముందుగా సోమవారం ఫరీదాబాద్‌లో అరెస్టు చేశారు.
జైషే మహ్మద్ అధినేత మసూద్ అజార్ సోదరి సహీదా అజార్‌తో డాక్టర్ షాహీన్‌కు పరిచయం ఉన్నట్లు విచారణలో తేలింది. ఆమె సూచనల మేరకు భారతదేశంలో జైషే కోసం మహిళా ఉగ్రవాద దళాన్ని సిద్ధం చేస్తున్నట్లు దర్యాప్తులో వెల్లడైంది. ఆమెకు జైషే జమాత్ ఉల్ మోమినాత్ సంస్థతో సంబంధం ఉంది.
లక్నో నివాసి షాహీన్ ఫరీదాబాద్‌లోని అల్ఫాలా యూనివర్సిటీలో పనిచేస్తున్నట్లు తెలిసింది. ముజమ్మిల్ సమాచారం మేరకు జమ్మూ కాశ్మీర్‌ పోలీసులు ఫరీదాబాద్‌లో ఆమెను అదుపులోకి తీసుకున్నారు. తన కారులో AK-47 దాచుకోవడానికి అతనికి అనుమతి ఇచ్చింది. ఈ ఉగ్రవాద నెట్‌వర్క్‌లో ఆమె కూడా భాగమేనని విచారణలో తేలింది.
మరోవైపు ఢిల్లీ పోలీసు బృందం అల్ఫాలా యూనివర్సిటీకి చేరుకుంది. ఢిల్లీ పోలీసులు సీసీ కెమెరాలను పరిశీలిస్తున్నారు. క్రైమ్ బ్రాంచ్, పోలీసు బృందాలు ఇప్పటికీ విశ్వవిద్యాలయం లోపల ఉన్నాయి.
