ఎన్డీయేకు బిగ్ షాక్.. బంధం తెంచుకున్న పన్నీర్‌ సెల్వం..!
తమిళనాడు మాజీ ముఖ్యమంత్రి ఓ పన్నీర్‌సెల్వం నేతృత్వంలోని అన్నాడీఎంకే క్యాడర్ హక్కుల పునరుద్ధరణ కమిటీ గురువారం బీజేపీ నేతృత్వంలోని నేషనల్ డెమోక్రటిక్ అలయన్స్ (ఎన్‌డీఏ) నుంచి వైదొలుగుతున్నట్లు ప్రకటించింది.
By Medi Samrat
తమిళనాడు మాజీ ముఖ్యమంత్రి ఓ పన్నీర్‌సెల్వం నేతృత్వంలోని అన్నాడీఎంకే క్యాడర్ హక్కుల పునరుద్ధరణ కమిటీ గురువారం బీజేపీ నేతృత్వంలోని నేషనల్ డెమోక్రటిక్ అలయన్స్ (ఎన్‌డీఏ) నుంచి వైదొలుగుతున్నట్లు ప్రకటించింది. పన్నీర్‌సెల్వం, ఇతర ప్యానెల్ సభ్యులతో కలిసి జరిగిన విలేకరుల సమావేశంలో ప్రముఖ నాయకుడు, కమిటీ సలహాదారు ఎస్.రామచంద్రన్ ఈ ప్రకటన చేశారు. “ఇకపై, కమిటీ నేషనల్ డెమోక్రటిక్ అలయన్స్‌లో భాగం కాదు” అని రామచంద్రన్ విలేకరులతో అన్నారు. పన్నీర్‌సెల్వం త్వరలో తమిళనాడులోని వివిధ ప్రాంతాలలో ప్రజలతో మమేకం కావడానికి, కమిటీ స్థావరాన్ని బలోపేతం చేయడానికి పర్యటిస్తారని అన్నారు. రాజకీయ పరిస్థితి ఎలా ఉంటుందో చూసి, భవిష్యత్తులో ఏవైనా రాజకీయ పొత్తులపై ఈ బృందం నిర్ణయం తీసుకుంటుందని రామచంద్రన్ అన్నారు.
ఓపీఎస్‌ వర్గం 2026 అసెంబ్లీ ఎన్నికల్లో BJP తో పొత్తు లేదని స్పష్టం చేసింది. అలాగే ఇతర పార్టీలతో పొత్తుపై త్వరలో ప్రకటిస్తామని రామచంద్రన్ ప్రకటించారు. ప్రస్తుతానికి, ఏ పార్టీతోనూ పొత్తు లేదని, భవిష్యత్తులో, పరిస్థితులను బట్టి, పొత్తుపై నిర్ణయం తీసుకుంటామని అన్నారు. అలాగే ఎన్డీయే కూటమి నుంచి వైదొలగడానికి కారణం అందరికీ తెలిసిందేనని, వివరణ అవసరం లేదన్నారు.
