చిత్తూరు జిల్లా నగరి వద్ద సినీఫక్కీలో చోరి జరిగింది. మొబైల్‌ ఫోన్లతో వెలుతున్న లారీని దుండగులు అపహరించి.. ఆ లారీని మరో ప్రాంతంలో వదిలిపెట్టి పరారయ్యారు. ఈ ఘటనలో సుమారు రూ.7కోట్లు విలువైన మొబైల్‌ ఫోన్లు అపహరించినట్లు సమాచారం. ఈ ఘటన చిత్తూరు జిల్లాలో కలకలం సృష్టించింది.

పూర్తి వివరాల్లోకి వెళ్తే.. తమిళనాడులోని కాంచీపురం శ్రీపెరంబూరు నుంచి ముంబైలోని షియోమీ సంస్థ గోదాముకు లారీలో మొబైల్‌ ఫోన్లను తీసుకువెలుతున్నారు. తమిళనాడు-ఏపీ సరిహద్దులో ఈ ఘటన జరిగింది. ఏపీ సరిహద్దులోకి రాగానే దుండగులు లారీని మరో లారీతో ఓవర్‌ టేక్‌ చేశారు. గన్‌తో డ్రైవర్‌ను బెదిరించి కాళ్లు, చేతులు కట్టేసి సెల్‌ఫోన్‌ లోడ్‌ ఉన్న లారీతో పరారయ్యారు. అయితే.. ఆ లారీని నగరి సమీపంలోని హైవేపై వదిలినట్లు పోలీసులు గుర్తించారు. మొబైల్‌ ఫోన్లను మరో లారీలోకి మార్చి ఉంటారని భావిస్తున్నారు. ఆ లారీలో 16 పెట్టెల్లో రూ.12కోట్ల విలువైన 15వేల మొబైల్‌ ఫోన్లను ఉన్నాయి. వీటిలో 8 పెట్టెల్లోని ఫోన్లను మాత్రమే దుండగులు అపహరించి మిగతా 8 పెట్టెలను వదిలేసి వెళ్లారు. డ్రైవర్‌ ఫిర్యాదుతో కేసు నమోదు చేసిన పోలీసులు దర్యాప్తు చేపట్టారు.

వంశికుమార్ తోట

నాపేరు వంశికుమార్. నేను న్యూస్ మీటర్ తెలుగులో జర్నలిస్ట్ గా పనిచేస్తున్నాను. గతంలో నేను ఆంధ్రప్రభ, ఆంధ్ర‌జ్యోతిలో పనిచేశాను. జర్నలిజం పట్ల నాకు ఉన్న ఇష్టం, ఆసక్తితో నేను ఈ వృత్తిని ఎంచుకున్నాను.