Amazon LayOffs : 30 వేల మంది ఉద్యోగులకు షాక్..!

ప్రముఖ ఈ-కామర్స్ సంస్థ అమెజాన్ ఖర్చులను తగ్గించుకునేందుకు పెద్ద ఎత్తున ఉద్యోగులను తొలగించబోతోంది. వార్తా సంస్థ రాయిటర్స్ ప్రకారం.. అమెజాన్ దాదాపు 30,000 మందిని తొలగించాలని యోచిస్తోంది. దీని ద్వారా.. కొవిడ్‌ సమయంలో డిమాండ్ ఎక్కువగా ఉన్న సమయంలో కంపెనీ అదనపు నియామకాలకు పరిహారం చెల్లిస్తోంది. అమెజాన్ మొత్తం ఉద్యోగాల‌లో ఈ సంఖ్య 1% కంటే తక్కువ. ఇది కంపెనీ 55 మిలియన్ల ఉద్యోగులలో ఒక చిన్న భాగం. అయితే.. 2022 చివర్లో దాదాపు 27,000 స్థానాలను తొలగించిన అమెజాన్.. ఆ త‌ర్వాత ఇప్పుడే భారీగా ఉద్యోగుల‌ను తొల‌గిస్తుంది. ఈ చర్య అమెజాన్ యొక్క కార్పొరేట్ సిబ్బందిపై పెద్ద ప్రభావాన్ని చూపుతుంది.ఎందుకంటే ఇది కంపెనీలోని సుమారు 3.5 లక్షల కార్పొరేట్ ఉద్యోగులలో 10% మందిని ప్రభావితం చేస్తుంది.

గత కొన్నేళ్లుగా అవసరానికి మించి ఎక్కువ మంది ఉద్యోగులు రిక్రూట్ అయ్యారని, అందుకే ఇప్పుడు తమ సిబ్బందిని తగ్గించి పనిని బ్యాలెన్స్ చేయాలని కంపెనీ చెబుతోంది. ఈ నిర్ణయం అమెజాన్‌లోని అనేక విభాగాలను ప్రభావితం చేయవచ్చు. అమెజాన్ గత రెండేళ్లుగా వివిధ విభాగాలలో ఉద్యోగుల సంఖ్యను క్రమంగా తగ్గిస్తోంది. ఇందులో పరికరాలు, కమ్యూనికేషన్, పోడ్‌కాస్టింగ్, ఇతర యూనిట్లకు చెందిన ఉద్యోగులు ఉన్నారు. ఈ తొలగింపులు పరికరాలు, సేవలు, కార్యకలాపాల విభాగాలు వంటి అనేక అమెజాన్ విభాగాలను కూడా ప్రభావితం చేస్తాయి. ఇలా అన్ని రంగాల్లో ఉద్యోగుల సంఖ్యను తగ్గించేందుకు ప్రణాళిక రూపొందించారు. మంగళవారం ఉదయం ఈమెయిల్ ద్వారా తొల‌గించ‌బ‌డిన ఉద్యోగుల‌కు స‌మాచార‌మివ్వ‌నున్న‌ట్లు రాయిట‌ర్స్ పేర్కొంది. ఇంతకుముందు.. అమెజాన్ CEO ఆండీ జాస్సీ సంస్థలో పెరుగుతున్న బ్యూరోక్రసీని తగ్గించే ప్రణాళికలను ప్రకటించారు.. ఇందులో మేనేజర్ల సంఖ్యను కూడా తగ్గించడం కూడా ఉంది. ఆర్టిఫిషియల్ ఇంటెలిజెన్స్ (ఏఐ) వినియోగం పెరగడం వల్ల భవిష్యత్తులో మరిన్ని ఉద్యోగాలు తగ్గిపోవచ్చని జూన్‌లో చెప్పారు.