14 రోజుల పాటు అమెరికా విడిచి వెళ్ల‌కండి.. ఉద్యోగులకు మెటా, మైక్రోసాఫ్ట్ నోటీసులు

హెచ్1-బీ వీసాపై డొనాల్డ్ ట్రంప్ కొత్త ప్రకటన తర్వాత అమెరికాలో కలకలం రేగుతోంది. ముఖ్యంగా మెటా, మైక్రోసాఫ్ట్ వంటి పెద్ద పెద్ద టెక్ కంపెనీలు దేశం విడిచి వెళ్లవద్దని తమ ఉద్యోగులకు విజ్ఞప్తి చేస్తున్నాయి. శనివారం ఉదయం ట్రంప్ H1-B వీసా ఫీజులను పెంచిన తర్వాత మెటా, మైక్రోసాఫ్ట్ 14 రోజుల పాటు అమెరికాను విడిచిపెట్టకూడదని పేర్కొన్నాయి. మెటా, మైక్రోసాఫ్ట్ US వెలుపల నివసిస్తున్న ఉద్యోగులందరికీ ఈమెయిల్ పంపాయి. ఇందులో ప్రతి ఒక్కరూ 24 గంటల్లో అమెరికాకు తిరిగి రావాలని విజ్ఞప్తి చేశారు. అలాగే, H1-B వీసా హోల్డర్లు 14 రోజుల పాటు దేశం విడిచి వెళ్లవద్దని కోరారు. విదేశీ ఉద్యోగులకు ఈమెయిల్‌లో నోటీసు జారీ చేయబడింది. META H1-B వీసా, H4 వీసా హోల్డర్‌లను 24 గంటలలోపు USకి తిరిగి రావాలని కోరింది. అదే సమయంలో.. కంపెనీకి చెందిన H1-B వీసా హోల్డర్లు 14 రోజుల పాటు దేశం నుండి బయటకు వెళ్లకూడదని, లేకుంటే వారు తిరిగి రావడంలో ఇబ్బంది పడవచ్చని మైక్రోసాఫ్ట్ తెలిపింది.

అమెరికాలో అత్యధికంగా హెచ్‌1-బీ వీసాదారులను కలిగి ఉన్న సంస్థ అమెజాన్. రాయిటర్స్ నివేదిక ప్రకారం.. అమెజాన్ ఉద్యోగులందరికీ నోటీసు జారీ చేసింది. ఎగ్జిక్యూటివ్ ఆర్డర్‌పై సంతకం చేయడం ద్వారా అమెరికా అధ్యక్షుడు డొనాల్డ్ ట్రంప్ H1-B వీసా ఫీజును 1 లక్ష డాలర్లకు (దాదాపు రూ. 90 లక్షలు) పెంచారు. ఈ ఆర్డర్ సెప్టెంబరు 21న అంటే రేపటి నుంచి అమలులోకి వస్తుంది. 12 నెలల పాటు అమల్లో ఉంటుంది. దీని తర్వాత ట్రంప్ దానిని ముందుకు తీసుకెళ్లవచ్చు.