Video : ధనవంతులకు ఎందుకు వేర్వేరు నియమాలు.? వివాహ వేడుకపై తీవ్ర విమర్శలు
ఇరాన్‌లో ముస్లిం మహిళలు హిజాబ్ ధరించనందుకు రకరకాల వేధింపులను ఎదుర్కోవాల్సి వస్తోంది.
By - Medi Samrat
ఇరాన్‌లో ముస్లిం మహిళలు హిజాబ్ ధరించనందుకు రకరకాల వేధింపులను ఎదుర్కోవాల్సి వస్తోంది. ఈ క్ర‌మంలోనే సోషల్ మీడియాలో ఒక వీడియో వైరల్ అవుతుంది, ఇందులో ఇరాన్ సుప్రీం నాయకుడు అయతుల్లా అలీ ఖమేనీ యొక్క సీనియర్ సహాయకుడు అలీ శంఖానీ కుమార్తె స్ట్రాప్‌లెస్ వివాహ దుస్తులను ధరించినట్లు ఆ వీడియోలో చూడవచ్చు. ఇది ఇంటర్నెట్‌లో కొత్త చర్చను ప్రారంభించింది.
డైలీ మెయిల్‌లోని ఒక నివేదిక ప్రకారం, ఈ వీడియో అక్టోబర్ 17 న ఇంటర్నెట్‌లో వైరల్ అయ్యింది. ఈ వీడియోలో అయతుల్లా అలీ ఖమేనీ ఉన్నత సలహాదారు, ఇరాన్ సుప్రీం నేషనల్ సెక్యూరిటీ కౌన్సిల్ మాజీ కార్యదర్శి అలీ శంఖానీ కనిపించారు. ఈ వీడియో బయటపడిన తర్వాత విమర్శకులు ఇరాన్ పాలనపై, వారి కఠినమైన హిజాబ్ చట్టానికి సంబంధించి అనేక ప్రశ్నలను లేవనెత్తారు.
ఈ వీడియోలో శంఖాని తన కుమార్తె ఫతేమెను ఒక హోటల్‌కు తీసుకువెళుతున్నాడు. అందులో ఆమె పెళ్లి కూతురు వ‌స్త్ర‌దార‌ణ‌లో కనిపిస్తుంది. ఫతేమె గౌను ధరించి అతిథులను పలకరిస్తూ లోపలికి రావడం కనిపిస్తుంది. ఈ వివాహ వేడుక మహిళలకు ప్రభుత్వం విధించిన కఠినమైన డ్రెస్ కోడ్‌కు పూర్తి విరుద్ధంగా ఉంది. దీంతో దీనిపై తీవ్ర విమర్శలు వస్తున్నాయి. హిజాబ్‌కు సంబంధించిన చట్టాలను సామాన్యులపై ప్రయోగిస్తున్నారని.. ధనవంతులు దానిని విస్మరిస్తున్నారని విమర్శించారు.
ఈ వీడియో మాసిహ్ అలినేజాద్ అనే ఖాతా నుండి సోషల్ మీడియా ప్లాట్‌ఫారమ్ Xలో పోస్ట్ చేయబడింది. ఇస్లామిక్ రిపబ్లిక్‌లోని టాప్ ఎన్‌ఫోర్స్‌లలో ఒకరైన అలీ శంఖానీ కుమార్తె స్ట్రాప్‌లెస్ డ్రెస్‌లో అద్భుతంగా పెళ్లి చేసుకున్నట్లు ఈ వీడియోతో పాటు పోస్ట్‌లో వ్రాయబడింది. ఇరాన్‌లో జుట్టు క‌నిపించినందుకు మహిళలను కొట్టారు. యువకులు వారిని వివాహం చేసుకోరు. అలాంటి క‌ఠిన ఆంక్ష‌లు ఉన్న‌వేళ.. ఈ వీడియో లక్షలాది మంది ఇరానియన్లకు ఆగ్రహం తెప్పించింది.
ఇరాన్ అత్యున్నత నాయకుడు అయతుల్లా అలీ ఖమేనీ ముఖ్య సలహాదారు తన కుమార్తె వివాహాన్ని చాలా ఘ‌నంగా చేశారు. వెంట్రుకలను చూపించినందుకు అమ్మాయిని చంపి, ఆడపిల్లలను వ్యాన్‌లలోకి లాగడానికి 80,000 మంది నైతికత పోలీసులను నియమించిన ప్రభుత్వమే.. విలాసవంతమైన పార్టీకి మ‌ద్ద‌తు ఇస్తుంది. ఇది ద్వంద్వత్వం కాదా, ఇదేం వ్యవస్థ అని పోస్ట్‌లో పేర్కొన్నారు. తన సొంత కుమార్తెలు డిజైనర్ దుస్తులలో కవాతు చేస్తున్నప్పుడు ఆయ‌న డెకోరమ్ బోధిస్తాడు. సందేశం స్పష్టంగా ఉండకూడదు.. నియమాలు మీ కోసం కాదు అని మండిప‌డ్డారు.
