'మూడో ప్రపంచ యుద్ధం జరగనివ్వను'.. ప్రమాణ స్వీకారానికి ముందు ట్రంప్ కీల‌క వ్యాఖ్య‌లు

డోనాల్డ్ ట్రంప్ నేడు అమెరికా అధ్య‌క్షుడిగా ప్రమాణ స్వీకారం చేయనున్నారు. ప్రమాణ స్వీకారోత్సవానికి ముందు లాంఛనంగా కార్యక్రమాలు ప్రారంభమయ్యాయి. "మేము మన దేశాన్ని మునుపెన్నడూ లేని విధంగా గొప్పగా మార్చబోతున్నాం. రేపు మధ్యాహ్నం (జనవరి 20) దేశాన్ని తిరిగి దాని వైభవానికి తీసుకురాబోతున్నాం" అని వాషింగ్టన్‌లో జరిగిన మేక్ అమెరికా గ్రేట్ ఎగైన్ (MAGA) ర్యాలీలో ఆయన అన్నారు. అమెరికాలో నాలుగేళ్ల సుదీర్ఘ పతనానికి తెర పడిందని ట్రంప్ అన్నారు. ఈ క్ర‌మంలోనే ట్రంప్‌.. బిడెన్ పరిపాలనపై దాడి చేశాడు. విఫలమైన, అవినీతి రాజకీయ పాలనను మనం ఒక్కసారిగా అంతం చేయబోతున్నామ‌న్నారు. దీన్ని ఇకపై సహించబోమన్నారు. ఈ కార్యక్రమానికి టెస్లా యజమాని ఎలోన్ మస్క్ కూడా హాజరయ్యారు. నటుడు జోన్ వోయిట్, సంగీతకారుడు కిడ్ రాక్‌తో సహా పలువురు ప్రముఖులు ర్యాలీకి హాజరయ్యారు.

రష్యా-ఉక్రెయిన్ యుద్ధాన్ని కూడా ట్రంప్ ప్రస్తావించారు. "నేను ఉక్రెయిన్‌లో యుద్ధాన్ని ముగిస్తాను, మధ్యప్రాచ్యంలో గందరగోళాన్ని ఆపివేస్తాను. మూడవ ప్రపంచ యుద్ధం జరగకుండా నిరోధిస్తాను. మ‌నం మూడవ ప్రపంచ యుద్ధానికి ఎంత దగ్గరగా ఉన్నామో మీకు తెలియదు" అని అన్నారు. అమెరికా పిల్లల్లో దేశభక్తి భావం పెంచేందుకు.. మేము మా పాఠశాలల్లో ప్ర‌త్యేక కార్య‌క్ర‌మాలతో రాబోతున్నామని, మా సైన్యం, ప్రభుత్వం నుండి రాడికల్ వామపక్ష భావజాలాలను తరిమికొట్టబోతున్నామని ర్యాలీలో అన్నారు. మేము అమెరికాను మళ్లీ గొప్పగా చేయబోతున్నామ‌ని పేర్కొన్నారు.

సమాచారం ప్రకారం, ట్రంప్‌ పదవిని స్వీకరించిన తర్వాత వైట్ హౌస్‌లోకి ప్రవేశించిన వెంటనే 100 కంటే ఎక్కువ ఎగ్జిక్యూటివ్ ఆర్డర్‌లపై సంతకం చేయబోతున్నారు. NBC న్యూస్‌కి ఇచ్చిన ఇంటర్వ్యూలో ట్రంప్ తన మొదటి రోజున రికార్డు స్థాయిలో కార్యనిర్వాహక ఉత్తర్వులపై సంతకం చేయాలని యోచిస్తున్నట్లు చెప్పారు. కార్యనిర్వాహక ఉత్తర్వు అనేది రాష్ట్రపతి ఏకపక్షంగా జారీ చేసే ఉత్తర్వు, దీనికి చట్టబద్ధత ఉంటుంది. శాసనాల వలె కాకుండా, కార్యనిర్వాహక ఉత్తర్వులకు కాంగ్రెస్ ఆమోదం అవసరం లేదు. కాంగ్రెస్ వాటిని తిప్పికొట్టదు, కానీ వాటిని కోర్టులో సవాలు చేయవచ్చు. ఇదిలావుంటే.. సోమవారం జరగనున్న ప్రమాణ స్వీకారోత్సవానికి భారత ప్రభుత్వం తరపున విదేశీ వ్యవహారాల మంత్రి ఎస్ జైశంకర్ హాజరుకానున్నారు.