Cyclone Ditwah : దిత్వా తుఫాను విధ్వంసం.. 123 మంది మృతి
తుఫాన్‌ దిత్వా శ్రీలంకలో భయంకరమైన విధ్వంసం సృష్టించింది. తుఫాను కారణంగా ఇక్కడ కనీసం 123 మంది మరణించారు. సహాయక చర్యలు శరవేగంగా జరుగుతున్నాయి.
By - Medi Samrat
తుఫాన్‌ దిత్వా శ్రీలంకలో భయంకరమైన విధ్వంసం సృష్టించింది. తుఫాను కారణంగా ఇక్కడ కనీసం 123 మంది మరణించారు. సహాయక చర్యలు శరవేగంగా జరుగుతున్నాయి. ఇప్పుడు దిత్వా తుపాను భారత్ వైపు మళ్లింది. తుఫాను కారణంగా చాలా విమానాలు రద్దు అయ్యాయి. విమానాలు రద్దు కావడంతో 300 మంది భారతీయ ప్రయాణికులు మూడు రోజులుగా కొలంబోలో చిక్కుకుపోయారు.
దిత్వా తుఫాను కారణంగా చెన్నైకి వెళ్లే చాలా విమానాలు అయ్యాయి. దీంతో దుబాయ్ నుండి శ్రీలంక మీదుగా భారతదేశానికి రావాల్సిన సుమారు 300 మంది ప్రయాణికులు గత మూడు రోజులుగా కొలంబోలోని బండారునాయకే అంతర్జాతీయ విమానాశ్రయంలో చిక్కుకుపోయారు. వీరిలో దాదాపు 150 మంది ప్రయాణికులు తమిళులే.
ప్రతికూల వాతావరణం కారణంగా కార్యకలాపాలకు అంతరాయం ఏర్పడినందున తమకు సరైన ఆహారం, నీరు, కనీస సౌకర్యాలు లభించడం లేదని విమానాశ్రయంలో చిక్కుకున్న ప్రయాణికులు ఆరోపిస్తున్నారు.
తమిళనాడు సీఎం ఎం.కె. స్టాలిన్ కొలంబోలోని భారత రాయబార కార్యాలయంతో సమన్వయం చేసుకోవాలని ప్రభుత్వ శాఖ కార్యదర్శిని ఆదేశించారు. ఆ తర్వాత కొలంబోలో చిక్కుకుపోయిన తమిళులను సురక్షితంగా తిరిగి వచ్చేలా చూసేందుకు అధికారులు.. భారత హైకమిషన్ అధికారులతో మాట్లాడారు. విమానాశ్రయంలో ఇబ్బందులు పడుతున్న ప్రయాణికులను ఆదుకోవాలని ప్రభుత్వం కోరింది.
దిత్వా తుఫాను కారణంగా ప్రభావితమైన శ్రీలంకకు భారత్ తన మానవతా సహాయాన్ని అందించింది. తుఫానులో మరణించిన వ్యక్తులకు ప్రధాని నరేంద్ర మోదీ కూడా సంతాపం వ్యక్తం చేశారు. అత్యవసర సహాయాన్ని పంపినట్లు ధృవీకరించారు.
భారత వాతావరణ శాఖ ప్రకారం.. శ్రీలంక తర్వాత, తుఫాను దిత్వా ఇప్పుడు ఉత్తర తమిళనాడు, పుదుచ్చేరి, దక్షిణ ఆంధ్రప్రదేశ్ తీరాల వైపు వేగంగా కదులుతోంది. తమిళనాడు, దక్షిణ ఆంధ్రప్రదేశ్, పుదుచ్చేరిలో భారీ నుంచి అతి భారీ వర్షాలు కురిసే అవకాశం ఉందని IMD హెచ్చరికలు జారీ చేసింది.
దిత్వా తుఫాను ఆదివారం ఉదయానికి ఉత్తర తమిళనాడు, దక్షిణ ఆంధ్రప్రదేశ్ తీరాలకు చేరుకుంటుంది. ఈ సమయంలో భారీ వర్షంతో పాటు గంటకు 100 కిలోమీటర్ల వేగంతో గాలులు వీస్తాయి.
