భవనాన్ని ఢీకొట్టి.. ఆపై మొబైల్ దుకాణంపై పడిన విమానం.. 10 మంది మృతి

బ్రెజిల్‌లోని గ్రామాడో నగరంలో ఆదివారం జరిగిన విమాన ప్రమాదంలో 10 మంది మృతి చెందగా.. పలువురు గాయపడ్డారు. విమానం ఇంటి చిమ్నీని ఢీకొట్టడంతో ఈ ప్రమాదం జరిగింది. చిమ్నీని ఢీకొట్టిన‌ తర్వాత విమానం మొబైల్ ఫోన్ షాపుపై పడింది. ఈ ప్రమాదంలో విమానంలోని 10 మంది ప్రయాణికులు మరణించారు.. 17 మంది గాయపడ్డారు. నివాస ప్రాంతంలో విమానం ప్రమాదానికి గురై చాలా మంది మరణించినట్లు బ్రెజిల్ సివిల్ డిఫెన్స్ ఏజెన్సీ తెలిపింది. ప్రమాదంలో గాయపడిన వారిలో ఇద్దరి పరిస్థితి విషమంగా ఉంది.

బ్రెజిల్‌లోని గ్రామాడో నగరం రియో ​​గ్రాండే దో సుల్ రాష్ట్రంలో ఉన్న ఒక పర్యాటక ప్రదేశం. ఇక్కడ రద్దీ ఎక్కువగా ఉంటుంది. ఆదివారం జరిగిన ఈ ప్రమాదంతో కొద్దిసేపు గందరగోళ వాతావరణం నెలకొంది. విమాన ప్రమాదానికి గల కారణాలు ఇంకా తెలియరాలేదు. స్థానిక మీడియా నివేదికల ప్రకారం.. విమానంలో బ్రెజిలియన్ వ్యాపారవేత్త, అతని కుటుంబ సభ్యులు సావోపోలో వెళ్తున్నారు.

ఈ విమానంలో ప్రయాణిస్తున్న వారంతా ఒకే కుటుంబానికి చెందిన వారు. ఇది ఒక ప్రైవేట్ విమానం. దీనిని బ్రెజిలియన్ వ్యాపారవేత్త లూయిజ్ క్లాడియో గలియాజ్జీ నడుపుతున్నారు. ఈ ప్రమాదంలో అతని భార్య, ముగ్గురు కుమార్తెలు, ఇతర కుటుంబ సభ్యులు మృతి చెందారు. తన కంపెనీ తరపున ఒక ప్రకటన జారీ చేయడం ద్వారా ఈ సమాచారం అందించబడింది. ఈ ఘటనలో 17 మంది గాయపడినట్లు స్థానిక అధికారులు తెలిపారు.

బ్రెజిలియన్ మీడియా నివేదికల ప్రకారం.. 61 ఏళ్ల వ్యాపారవేత్త గలియాజ్జీ తన కుటుంబాన్ని యాత్రకు తీసుకువెళుతున్నాడు. విమాన ప్రమాదంపై ఖచ్చితమైన సమాచారం వెల్లడి కాలేదు. ఇప్పటి వరకు వాతావరణం ప్రతికూలంగా ఉండటమే ఇందుకు కారణమని చెబుతున్నారు. కనెలా విమానాశ్రయం నుండి చిన్న పైపర్ విమానం టేకాఫ్ అవుతున్నట్లు సెక్యూరిటీ కెమెరాలు బంధించాయి. ఈ విమానాశ్రయం రియో ​​గ్రాండే దో సుల్ రాష్ట్రంలో ఉంది. విమానాశ్రయానికి 10 కి.మీ దూరంలో ఉన్న గ్రామడోలో ఈ ప్రమాదం జరిగింది. క్రిస్మస్ సెలవుల కోసం చాలా మంది ప్రజలు అక్క‌డ‌కు త‌ర‌లివ‌చ్చిన‌ట్లు చెబుతున్నారు.