సోషల్ మీడియా నిషేదం దిశగా ప్రభుత్వం అడుగులు.. త్వ‌ర‌లో చ‌ట్టం

16 సంవత్సరాల కంటే త‌క్కువ వయస్సు ఉన్న పిల్లలను సోషల్ మీడియాను ఉపయోగించకుండా నిషేధిస్తూ ఆస్ట్రేలియా నిర్ణ‌యం తీసుకుని చ‌ట్టం తెచ్చేందుకు సిద్ధ‌మైంది. పిల్లలను ఎల‌క్ట్రానిక్‌ పరికరాల నుండి "మైదానాల్లోకి" తీసుకురావాలని ఆ దేశ ప్రధాని మంగళవారం పిలుపునిచ్చారు. ప్ర‌ధాని ఆంథోనీ అల్బనీస్ మాట్లాడుతూ.. పిల్లలను సోషల్ మీడియాకు దూరంగా ఉంచడానికి ఫెడరల్ చట్టం ఈ సంవత్సరం ప్రవేశపెడ‌తామ‌న్నారు.

ఫేస్‌బుక్, ఇన్‌స్టాగ్రామ్, టిక్‌టాక్ వంటి సైట్‌లకు లాగిన్ చేయడానికి పిల్లలకు కనీస వయస్సు నిర్ణయించలేదు. అయితే ఆ వ‌య‌స్సు 14-16 సంవత్సరాల మధ్య ఉండవచ్చని అల్బనీస్ అన్నారు. నేను పిల్లలను వారి ఎల‌క్ట్రానిక్‌ పరికరాలకు దూరంగా.. ఫుట్ ఫీల్డ్‌లు, స్విమ్మింగ్ పూల్స్, టెన్నిస్ కోర్ట్‌లలో చూడాలనుకుంటున్నాను" అని అల్బనీస్ చెప్పారు.

"సోషల్ మీడియా సామాజిక హాని కలిగిస్తుందని మాకు తెలుసు కాబట్టి.. వారికి నిజమైన వ్యక్తులతో నిజమైన అనుభవాలు ఉండాలని మేము కోరుకుంటున్నాము" అని చెప్పాడు. "సోషల్ మీడియా ఒక శాపంగా ఉంది. చాలా మంది యువకులు ఎదుర్కొనే మానసిక ఆరోగ్య పరిణామాలు మాకు తెలుసు," అని అన్నారు.

ఆస్ట్రేలియా సంప్రదాయవాద ప్రతిపక్ష నాయకుడు పీటర్ డటన్ వయోపరిమితికి మద్దతిస్తానని చెప్పారు. ఆలస్యం చేయడం వలన చిన్న పిల్లలు సోషల్ మీడియా హానికి గురవుతారు. వయోపరిమితిని అమలు చేయడానికి టెక్ కంపెనీలపై ఆధారపడే సమయం వస్తుందని అన్నారు.