అమెరికాలో భారత‌ సంతతి వ్యక్తి హత్య

అమెరికాలోని ఫిలడెల్ఫియాలో సాయుధ దోపిడీలో 66 ఏళ్ల భారతీయ సంతతికి చెందిన వ్యక్తి హత్యకు గురయ్యాడు. గ్యాస్ స్టేషన్ లో పని చేస్తున్న సదరు ఉద్యోగిని కొందరు దుండగులు కాల్చి చంపారు. హత్యకు సంబంధించి ముగ్గురు వ్యక్తుల కోసం పోలీసులు వెతుకుతున్నారని మీడియా నివేదికలు తెలిపాయి. ఫిలడెల్ఫియా పోలీసులు నిందితులకు సంబంధించిన సమాచారం ఉంటే చెప్పాలని ప్రజలను కోరారు. చనిపోయిన వ్యక్తిని పాత్రో సిబోరామ్‌గా గుర్తించారు.

ఈశాన్య ఫిలడెల్ఫియాలోని టాకోనీలోని టోర్రెస్‌డేల్ అవెన్యూలోని 7100 బ్లాక్‌లో ఈ సంఘటన జరిగింది. ముసుగు ధరించిన వ్యక్తులు ఈ దోపిడీకి పాల్పడ్డారు. ముసుగు ధరించిన వ్యక్తులు గ్యాస్ స్టేషన్‌లోని మినీ మార్ట్‌లోకి ప్రవేశించారు. స్టోర్ క్లర్క్ గా పాత్రో విధులు నిర్వర్తిస్తూఉన్నాడు. అతడిని వెనుక నుంచి కాల్చి నగదుతో పారిపోయారు. కొద్ది నిమిషాల తర్వాత ప్యాట్రో చనిపోయినట్లు వైద్యులు ప్రకటించారు. పాత్రో భారతదేశానికి చెందినవాడని.. ఇటీవలే విదేశీ పర్యటన నుండి తిరిగి వచ్చాడని CBS న్యూస్ ఫిలడెల్ఫియా నివేదించింది. అతనికి భార్య, ఒక కొడుకు ఉన్నాడు. పాత్రో చాలా మంచి వ్యక్తి అని స్థానికులు తెలిపారు.