అర్థరాత్రి ఇంటిపై బాంబు దాడి.. 9 మంది పిల్లలు స‌హా ఓ మ‌హిళ దుర్మ‌ర‌ణం

ఆఫ్ఘనిస్తాన్‌లోని ఖోస్ట్ ప్రావిన్స్‌లో పాకిస్థాన్ సైన్యం అర్థరాత్రి దాడి చేసింది. ఈ దాడిలో 9 మంది పిల్లలు, ఒక మహిళ మరణించారు. ఈ మేరకు ఆఫ్ఘన్‌ తాలిబాన్‌ అధికార ప్రతినిధి జబీహుల్లా ముజాహిద్‌ మంగళవారం సమాచారం అందించారు.

ఈ విష‌య‌మై సోషల్ మీడియా సైట్ X లో పోస్ట్ చేస్తూ ఇలా రాశారు.. 'ఖోస్ట్ ప్రావిన్స్‌లోని గెర్బాజ్వో జిల్లాలో గత రాత్రి 12 గంటలకు పాకిస్తాన్ దళాలు స్థానిక విలాయత్ ఖాన్ ఇంటిపై బాంబు దాడి చేశాయి. ఇందులో 9 మంది పిల్లలు (ఐదుగురు అబ్బాయిలు, న‌లుగురు అమ్మాయిలు), ఒక మహిళ మరణించారు. ఈ దాడిలో వారి ఇల్లు పూర్తిగా ధ్వంసమైంది.'

కునార్, పక్తికా ప్రావిన్స్‌లలో కూడా పాకిస్తాన్ దాడులు నిర్వహించిందని, నలుగురు పౌరులు గాయపడ్డారని తాలిబాన్ తెలిపింది. పాకిస్తాన్‌లోని పెషావర్‌లో సోమవారం జరిగిన రెండు ఆత్మాహుతి బాంబు పేలుళ్ల తర్వాత ఈ దాడులు జరిగాయి. ఇందులో ముగ్గురు పారామిలటరీ సైనికులు మరణించారు.

అంతకుముందు అక్టోబర్‌లో పాకిస్తాన్, ఆఫ్ఘనిస్తాన్ సైన్యాల మధ్య ఘర్షణ జరిగింది. ఇందులో చాలా మంది మరణించారు. అక్టోబరులో దోహాలో ఇరు పక్షాలు కాల్పుల విరమణపై సంతకం చేశాయి. అయితే మిలిటెంట్ గ్రూపులపై విభేదాల కారణంగా టర్కీలో శాంతి చర్చలు దీర్ఘకాలిక ఒప్పందం లేకుండానే విఫలమయ్యాయి.