హైదరాబాద్ లో వచ్చే వారం నుండి వాతావరణం ఎలా ఉండబోతోందంటే?

తెలుగు రాష్ట్రాల్లో ఉదయం ఉక్కపోత.. సాయంత్రం కాగానే చలి వాతావరణం కొనసాగుతూ ఉంది. ఈ చలికాలంలో తెలంగాణలో చలిగాలులు వీయలేదు, ఇకపై కూడా చలిగాలుల తీవ్రత ఉండే అవకాశం లేదని తెలుస్తూ ఉంది. జనవరి రెండో వారంలో ఉష్ణోగ్రతలు కాస్త తగ్గిన్నట్లు అనిపించాయి అంతే! ముఖ్యంగా హైదరాబాద్‌లో ఈ జనవరిలో 14 డిగ్రీల కంటే తక్కువకు ఉష్ణోగ్రతలు చేరలేదు.

భారత వాతావరణ శాఖ (IMD) ప్రకారం, ఫిబ్రవరి 2, శుక్రవారం నాడు హైదరాబాద్‌లో 32.4 ° C వద్ద పగటిపూట ఉష్ణోగ్రత నమోదైంది, రాబోయే నాలుగు రోజుల్లో 35 ° C వరకు చేరుకునే అవకాశం ఉంది. వచ్చే రోజుల్లో ఉష్ణోగ్రతలు మరింత పెరగనున్నాయని వాతావరణ శాఖ అధికారులు తెలిపారు. యూసుఫ్‌గూడలోని తెలంగాణ స్టేట్ డెవలప్‌మెంట్ ప్లానింగ్ సొసైటీ (TSDPS) ఆటోమేటిక్ వెదర్ స్టేషన్ రికార్డుల ప్రకారం పగటి ఉష్ణోగ్రత 34.1°C వద్ద నమోదైంది. GHMC పరిమితుల్లోని చాలా ప్రాంతాల్లో శనివారం, ఫిబ్రవరి 3, మధ్యాహ్నం 33°C కంటే ఎక్కువ ఉష్ణోగ్రతలు నమోదయ్యాయి.

పగటిపూట ఉష్ణోగ్రతలు సాధారణ స్థాయి కంటే ఎక్కువ ఉండగా.. రాత్రి ఉష్ణోగ్రతలు 17°C వద్ద ఉండాలి.. కానీ ఇప్పుడు సగటున 21.7°C నమోదవుతున్నాయి. ఇది సాధారణం కంటే ఐదు డిగ్రీల సెల్సియస్‌ ఎక్కువేనని స్పష్టంగా తెలుస్తోంది.