Video: సంగారెడ్డిలో దారుణం..మూడేళ్ల బాలుడిపై డజనుకు పైగా వీధికుక్కల దాడి

సంగారెడ్డి జిల్లా దౌల్తాబాద్‌లో దారుణం జరిగింది. డజనుకు పైగా వీధి కుక్కలు దాడి చేయడంతో మూడేళ్ల బాలుడు తీవ్రంగా గాయపడ్డాడు. సీసీటీవీ ఫుటేజీలో ఒక మహిళ నిమిషంలోనే చిన్నారిని రక్షించడానికి పరుగెత్తుకుంటూ వెళ్లి ప్రాణాపాయం నుంచి తప్పించింది. సీసీటీవీ దృశ్యాల్లో కుక్కలు బాలుడిపై దాడి చేయగా, ఆ బాలుడు ఏకాంత ప్రదేశంలో నిలబడి ఉన్నట్లు కనిపించింది. అతను సహాయం కోసం కేకలు వేయడంతో, ఒక నిమిషంలోనే ఒక మహిళ అతనిని రక్షించింది. దాడిలో అబూబకర్‌గా గుర్తించబడిన ఆ చిన్నారికి తీవ్ర గాయాలు అయ్యాయి. వెంటనే చికిత్స కోసం సంగారెడ్డిలోని ప్రభుత్వ ఆసుపత్రికి తరలించారు.

బాలుడిని రక్షించడంలో ఆలస్యం జరిగి ఉంటే అతను బతికి ఉండేవాడు కాదని ప్రత్యక్ష సాక్షులు తెలిపారు. సీసీటీవీ కెమెరాల్లో రికార్డైన ఈ దాడి తరువాత సోషల్ మీడియాలో వైరల్ అయింది. దౌల్తాబాద్‌లో వీధికుక్కల బెడదను నియంత్రించడానికి అధికారులు వెంటనే చర్యలు తీసుకోవాలని నివాసితులు డిమాండ్ చేశారు, గతంలో ఈ వీధి కుక్కలు చాలా మందిపై దాడి చేశాయని పేర్కొన్నారు. పట్టణంలో వీధికుక్కలు అధికంగా ఉన్నాయని ప్రజల భద్రతకు తీవ్రమైన ముప్పు కలిగిస్తున్నాయని వారు ఆరోపించారు.

బాలుడి ఆరోగ్య పరిస్థితిపై సంగారెడ్డి జిల్లా వైద్య, ఆరోగ్య అధికారి వసంత్ రావు మాట్లాడుతూ..బాలుడి పరిస్థితి నిలకడగా ఉందని తెలిపారు. తాము పెయిన్ కిల్లర్స్ ఇస్తున్నామని.. వాటితో పాటు యాంటీబయాటిక్స్, ఇమ్యునోగ్లోబులిన్, యాంటీ ఇన్ఫ్లమేటరీ మందులతో చికిత్స అందించామని వైద్యులు తెలిపారు. గురువారం ఆ బాలుడిని సంగారెడ్డి ప్రభుత్వ జనరల్ ఆసుపత్రి నుండి డిశ్చార్జ్ చేశామని వైద్యులు వెల్లడించారు.