హైదరాబాద్‌లో ల‌క్ష‌కు పైగా అమ్ముడుపోని గృహాలు

ఇటీవలే కోకా పేట్ భూములకు భారీ ధర పలకడంతో దేశం మొత్తం హైదరాబాద్ వైపు చూసింది. హైదరాబాద్ లో రియలెస్టేట్ అద్భుతంగా ఉందంటూ ప్రశంసలు కూడా దక్కాయి. ఇలాంటి సమయంలో హైదరాబాద్‌లో లక్ష మంది అమ్ముడుపోని ఇళ్లు కూడా ఉన్నాయని తేలింది. మహారాష్ట్రలోని థానే తర్వాత దేశంలో రెండవ స్థానంలో ఉన్న నగరం హైదరాబాద్ అని తాజా సర్వేలో తేలింది. భూములకు సంబంధించి భూమ్ ఉన్నా.. ఇళ్లు అమ్ముడుపోక పోవడం కాస్త ఆందోళనకరమైన విషయమే..!

హైదరాబాద్‌లో రియల్‌ ఎస్టేట్‌ మార్కెట్‌ స్వర్ణయుగాన్ని సంతరించుకుంటోంది. హైదరాబాద్ మెట్రోపాలిటన్ డెవలప్‌మెంట్ అథారిటీ కోకాపేట్‌లో జరిగిన వేలంలో భూముల నుండి ఏకంగా రూ.7000 కోట్లు సేకరించింది. మోకిలా వద్ద ఒక చదరపు గజం రూ. 25000గా ఉండగా.. రూ. 1.5 లక్షలు పలికింది. రాష్ట్ర అసెంబ్లీ ఎన్నికలకు ముందు ఈ వేలం నిర్వహించడం గమనార్హం. రియల్ ఎస్టేట్ బూమ్ ఉందని చెబుతున్నా.. ప్రజలు ఎందుకు ఆస్తులను కొనుగోలు చేయడం లేదనేది మిస్టరీగా మారింది.

హోమ్ ఇన్వెంటరీల పెరుగుదల- పతనం

రియల్ ఎస్టేట్ డేటా, అనలిటిక్స్, మార్కెట్ రీసెర్చ్ రిపోర్టులు, ప్రాపర్టీ ధరల ట్రెండ్‌ల విశ్లేషణకు సంబంధించిన ఆన్‌లైన్ ప్లాట్‌ఫారమ్ అయిన PropEquity ప్రకారం.. హైదరాబాద్‌లో అమ్ముడుపోని హౌసింగ్ స్టాక్‌లు 95,106 యూనిట్ల నుంచి 99,989 యూనిట్లకు పెరిగింది. ఏకంగా ఐదు శాతం పెరిగి 99,989 యూనిట్ల ఇల్లు అమ్ముడు పోకుండా ఉన్నాయి. జూన్ త్రైమాసికం చివరి నాటికి ముంబై మెట్రోపాలిటన్ రీజియన్‌లోని థానేలో అత్యధికంగా 1.07 లక్షల అమ్ముడుపోని గృహాలు ఉండగా, చెన్నైలో అత్యల్పంగా దాదాపు 20,000 యూనిట్లు ఉన్నాయి. తొమ్మిది ప్రధాన నగరాల్లో అమ్ముడు పోని హౌసింగ్ స్టాక్‌లకు సంబంధించి మార్చి చివరినాటికి 5,26,914 యూనిట్లు ఉండగా.. జూన్ త్రైమాసికం ముగిసే సమయానికి 5,15,169 యూనిట్లకు తగ్గాయని ప్రాప్‌ఈక్విటీ తెలిపింది.

“టైర్-1 నగరాల్లో అమ్ముడుపోని స్టాక్‌లో 21 శాతంతో థానే అతిపెద్ద వాటాను కలిగి ఉంది. క్యూ2 2023లో చెన్నైలో అతి తక్కువ రెసిడెన్షియల్ యూనిట్ల కనీస అమ్ముడుపోని స్టాక్ ఉంది, ”అని ప్రాప్‌ఈక్విటీ వ్యవస్థాపకుడు, CEO సమీర్ జసుజా చెప్పారు. తొమ్మిది నగరాల్లో ఏప్రిల్-జూన్‌లో గృహ విక్రయాలు 1,22,213 యూనిట్లు కాగా, 1,10,468 యూనిట్లు పెరిగాయి. దీంతో అమ్ముడుపోని రెసిడెన్షియల్ యూనిట్ల సంఖ్య తగ్గుముఖం పట్టింది. జూన్ త్రైమాసికం చివరి నాటికి థానేలో అమ్ముడుపోని హౌసింగ్ స్టాక్‌లు 1,07,179 యూనిట్లు, మార్చి చివరి నాటికి 109,511 యూనిట్ల నుండి 2 శాతం తగ్గాయి. ముంబైలో అమ్ముడుపోని హౌసింగ్ స్టాక్స్ 62,735 యూనిట్ల నుంచి 60,911 యూనిట్లకు పడిపోయాయి. నవీ ముంబైలో ఇన్వెంటరీలు 31,735 యూనిట్ల నుంచి 32,997 యూనిట్లకు పెరిగాయి. ఢిల్లీ-ఎన్‌సీఆర్‌లో ఇన్వెంటరీలు గరిష్ఠంగా 26 శాతం తగ్గి 56,866 యూనిట్ల నుంచి 42,133 యూనిట్లకు పడిపోయాయని గణాంకాలు చెబుతున్నాయి. చెన్నైలో అమ్ముడుపోని హౌసింగ్ స్టాక్స్ 18 శాతం క్షీణించి 24,362 యూనిట్ల నుంచి 19,900 యూనిట్లకు పడిపోయాయి.

పూణేలో అమ్ముడుపోని హౌసింగ్ స్టాక్‌లు తొమ్మిది శాతం పెరిగి 69,331 యూనిట్ల నుంచి 75,905 యూనిట్లకు పెరిగాయి. బెంగళూరులో అమ్ముడుపోని యూనిట్లు నాలుగు శాతం పెరిగి 49,986 యూనిట్ల నుంచి 52,208 యూనిట్లకు చేరుకున్నాయి. కోల్‌కతాలో అమ్ముడుపోని హౌసింగ్ స్టాక్‌లు 20 శాతం వృద్ధితో 18,247 యూనిట్ల నుంచి 21,947 యూనిట్లకు పెరిగాయి.

ఢిల్లీ-ఎన్‌సీఆర్ డేటాపై రియాల్టీ సంస్థ క్రిషుమి కార్పొరేషన్ ఎండీ మోహిత్ జైన్ మాట్లాడుతూ, “మంచి ఆర్థిక వృద్ధి, సహేతుకమైన వడ్డీ రేట్లు, పెంట్-అప్ డిమాండ్, పెట్టుబడి సామర్థ్యం వంటి అంశాల కలయిక అన్ని విభాగాల ప్రాపర్టీలకు బలమైన డిమాండ్‌కు దోహదపడింది." జైన్ ప్రకారం, అమ్ముడుపోని ఇన్వెంటరీలలో గణనీయమైన తగ్గింపు ఉంది, ముఖ్యంగా ఢిల్లీ-NCRలో డిమాండ్ కొత్త సరఫరాల కంటే ఎక్కువ అయిపోయింది.

కోకాపేట భూముల అమ్మకాలు:

ఆగస్టులో కోకాపేటలోని 45.33 ఎకరాల ప్రధాన భూమిని వేలం వేయడం ద్వారా తెలంగాణ ప్రభుత్వానికి రూ.3,319.6 కోట్ల ఆదాయం వచ్చింది. రాష్ట్ర అసెంబ్లీ ఎన్నికలకు ముందు ప్రభుత్వానికి ఇది భారీ ఆదాయం.

హైదరాబాద్ మెట్రోపాలిటన్ డెవలప్‌మెంట్ అథారిటీ (HMDA) MSTC సైట్ ద్వారా రంగారెడ్డి జిల్లా గండిపేట మండలం కోకాపేట్ ఫేజ్-IIలోని నియోపోలిస్‌లో ఓపెన్ ప్లాట్‌ల ఇ-వేలం నిర్వహించింది. ముంబై, బెంగళూరు, చెన్నై, హైదరాబాద్ మెట్రో నగరాల్లో పెట్టుబడిదారులు మరియు రియల్ ఎస్టేట్ డెవలపర్‌లను ఆకర్షించడానికి ప్లాట్ల వేలం నిర్వహించారు. బ్రిడేజ్ ఎంటర్‌ప్రైజెస్ రూ.660 కోట్లకు కొనుగోలు చేసింది. ఇది ఆ వేలంలో అత్యధికం. ప్లాట్ల అప్సెట్ ధర విలువ రూ.1,586.50 కోట్లు. వేలం ద్వారా వచ్చిన మొత్తం ఆదాయం రూ.3,319.6 కోట్లు. రాష్ట్రంలోనే రికార్డు స్థాయిలో ఎకరాకు అత్యధికంగా రూ.100.75 కోట్ల ధర పలికింది.