యాప్ ద్వారా బెట్టింగ్ రాకెట్.. హైదరాబాద్ లో అరెస్టులు

హైదరాబాద్ పోలీసులు యాప్ ద్వారా క్రికెట్ బెట్టింగ్ కు పాల్పడుతున్న రాకెట్‌ను ఛేదించారు. ఇందులో ఒక ప్రధాన బుకీ, సబ్-బుకీతో సహా ముగ్గురు వ్యక్తులను అరెస్టు చేశారు.

ఒక రహస్య సమాచారం మేరకు, టాస్క్ ఫోర్స్ అధికారులు హిమాయత్‌నగర్‌లోని అపార్ట్‌మెంట్‌లో వ్యవస్థీకృత ఆన్‌లైన్ క్రికెట్ బెట్టింగ్ డెన్‌ పై దాడి చేసి ముగ్గురు వ్యక్తులను పట్టుకున్నారు. హిమాయత్‌నగర్ నివాసి, ఆటోమొబైల్ వ్యాపారం చేసే శ్రీరాజ్ (42), ట్రావెల్ వ్యాపారవేత్త హెచ్ సాయినాథ్ (32), ప్రైవేట్ ఉద్యోగి రేగళ్ల గోపీనాథ్ లను అదుపులోకి తీసుకున్నారు. సాయినాథ్, గోపీనాథ్ ఇద్దరూ చిక్కడపల్లి నివాసితులు.

శ్రీరాజ్ ప్రధాన బుకీగా ఉండగా, సాయినాథ్ సబ్-బుకీగా, గోపీనాథ్ బెట్టింగ్ మొత్తాల వసూలు ఏజెంట్‌గా పనిచేస్తున్నారని హైదరాబాద్ టాస్క్ ఫోర్స్ డిప్యూటీ కమిషనర్ ఆఫ్ పోలీస్ వైవిఎస్ సుధీంద్ర తెలిపారు. అరెస్టు చేసిన వ్యక్తుల నుండి మూడు మొబైల్ ఫోన్లు, రూ.1.20 లక్షల నగదును స్వాధీనం చేసుకున్నట్లు సుధీంద్ర తెలిపారు. శ్రీరాజ్ బెట్టింగ్ నిర్వాహకుడని, చట్టవిరుద్ధంగా డబ్బు సంపాదించడానికి, అతను క్రికెట్ బెట్టింగ్‌లు నిర్వహిస్తున్నాడని, పంటర్‌ల నుండి బెట్టింగ్ మొత్తాన్ని స్వీకరిస్తున్నాడని పోలీసులు వెల్లడించారు. బెట్టింగ్ నిర్వహించడానికి, అతను సాయినాథ్, గోపీనాథ్‌లను కమీషన్ ప్రాతిపదికన నియమించుకున్నాడు. అపార్ట్‌మెంట్‌లో బెట్టింగ్ డెన్‌ను ఏర్పాటు చేశాడు.

ఐపీఎల్ క్రికెట్ మ్యాచ్‌ల సమయంలో అతను విదేశాల్లోని ఒక ఏజెంట్ నుండి www.radheexch.com అనే బెట్టింగ్ యాప్‌ను కొనుగోలు చేసి, దాని లాగిన్ ఐడీ, పాస్‌వర్డ్‌ను పంటర్లకు లైవ్ బెట్టింగ్ కోసం పంచుకున్నాడు. ఆన్‌లైన్ స్కోర్‌లను బాల్ టు బాల్, అలాగే బెట్టింగ్ రేషియోలను అందిస్తూ, శ్రీరాజ్ పంటర్‌ల నుండి రహస్యంగా బెట్టింగ్ మొత్తాన్ని సేకరించి కమిషన్ ఆధారంగా ప్రధాన బుకీకి పంపేవాడు. బుధవారం చెన్నై సూపర్ కింగ్స్ vs పంజాబ్ కింగ్స్ మధ్య జరుగుతున్న ఐపీఎల్ క్రికెట్ మ్యాచ్ సందర్భంగా, శ్రీరాజ్ ఆన్‌లైన్ బెట్టింగ్ యాప్ ద్వారా నేరుగా పంటర్‌ల నుండి క్రికెట్ బెట్టింగ్ మొత్తాన్ని తీసుకుంటున్నప్పుడు పోలీసులు పట్టుకున్నారు.