అకస్మాత్తుగా ఎస్కలేటర్ రివర్స్.. 10 మంది విద్యార్థులకు గాయాలు
10 students injured after escalator reverses at Banjara Hills RK Cinemax. హైదరాబాద్‌ బంజారాహిల్స్‌లోని పీవీఆర్‌ ఆర్కే సినీప్లెక్స్‌లో గురువారం.. ఎస్కలేటర్ అకస్మాత్తుగా రివర్స్ కావడంతో
By అంజి
హైదరాబాద్‌ బంజారాహిల్స్‌లోని పీవీఆర్‌ ఆర్కే సినీప్లెక్స్‌లో గురువారం.. ఎస్కలేటర్ అకస్మాత్తుగా రివర్స్ కావడంతో 10 మంది విద్యార్థులు, ఒక ఉపాధ్యాయుడు గాయపడ్డారు. గాయపడ్డవారిని భారతీయ విద్యాభవన్ పాఠశాలకు చెందిన విద్యార్థులు గుర్తించారు. వివరాల ప్రకారం.. భారతీయ విద్యాభవన్ పాఠశాల నుండి విద్యార్థులు స్వతంత్ర భారత వజ్రోత్సవాలలో భాగంగా 'గాంధీ' సినిమాను చూడటానికి బంజారాహిల్స్‌లోని ఆర్కే సినిమాక్స్‌కు చేరుకున్నారు. సినిమాక్స్‌లోని ఎస్కలేటర్ రివర్స్ కావడంతో విద్యార్థులు వెనుకకు పడిపోయారు.
గాయపడిన విద్యార్థులను వెంటనే అపోలో ఆస్పత్రికి తరలించి చికిత్స అందిస్తున్నారు. ఈ ఘటన జరిగినప్పుడు దాదాపు 30 మంది విద్యార్థులు, ఒక టీచర్ ఉన్నట్టు సమాచారం. అయితే విద్యార్థులంతా క్షేమంగా ఉన్నారని పాఠశాల యాజమాన్యం ఓ నోట్‌ను విడుదల చేసింది. బంజారాహిల్స్‌ ఎస్‌హెచ్‌ఓ ఎం. నరేందర్‌ మాట్లాడుతూ.. ఎస్కలేటర్ పనిచేయకపోవడంతో కొందరు విద్యార్థులు వేగంగా వెళ్లేందుకు ప్రయత్నించారని తెలిపారు. పిల్లలందరినీ వెంటనే అపోలో ఆసుపత్రికి తరలించామని, వారికి అవసరమైన చికిత్స అందించామని, ప్రాణాపాయం నుంచి బయటపడ్డారని చెప్పారు.
భారతీయ విద్యాభవన్ పాఠశాల వైస్ ప్రిన్సిపాల్ ఎస్ .వెంకటలక్ష్మి.. ఆందోళన చెందుతున్న తల్లిదండ్రులకు సమాచారం అందించారు. ఐనాక్స్‌లో సినిమా చూసేందుకు వెళ్లిన విద్యార్థులంతా క్షేమంగా ఉన్నారని, పది మంది విద్యార్థులకు స్వల్ప గాయాలయ్యాయని, పూర్తిగా క్షేమంగా ఉన్నారని, దయచేసి భయపడవద్దని, 6 నుంచి 12వ తరగతి చదువుతున్న విద్యార్థులకు తల్లిదండ్రులందరికీ తెలియజేసేందుకు ఒక సర్క్యులర్‌ను జారీ చేశారు. రాష్ట్ర ప్రభుత్వం 75వ స్వాతంత్య్ర దినోత్సవ వేడుకల్లో భాగంగా విద్యార్థుల కోసం థియేటర్లు, మల్టీప్లెక్స్‌లలో 'గాంధీ' సినిమా ప్రదర్శనను ఏర్పాటు చేసింది. 40 వేల మంది విద్యార్థులు సినిమా చూసేలా ఏర్పాట్లు చేశారు.
