FactCheck : నాగపంచమి రోజున ముస్లింలను కొట్టారంటూ వైరల్ అవుతున్న వీడియోలో నిజమెంత?

కర్ణాటక రాష్ట్రంలో నాగర్‌బెట్టలో ముస్లింలను పోలీసులు కొట్టినట్లు చూపించే వీడియో ఆన్‌లైన్‌లో వైరల్ అవుతూ ఉంది.

"నాగ పంచమి సందర్భంగా, మా పోలీసులు నాగరబెట్ట పూజను ఎంతో ఉత్సాహంగా జరుపుకున్నారు, వారికి నేను నమస్కరిస్తున్నాను" అనే శీర్షికతో ఒక X వినియోగదారు వీడియోను పంచుకున్నారు.

పలు సోషల్ మీడియా సైట్లలో ఈ వీడియోను వైరల్ చేశారు.

నిజ నిర్ధారణ:

న్యూస్‌మీటర్ వైరల్ అవుతున్న వాదనలో ఎలాంటి నిజం లేదని కనుగొంది.

రివర్స్ ఇమేజ్ సెర్చ్ చేయగా.. మార్చి 26, 2020 నాటి 'న్యూస్18' నివేదికను మేము గమనించాం. ‘వీడియో: లాక్‌డౌన్ సమయంలో నమాజ్ చేశారు, మసీదు నుండి బయటకు వచ్చిన వారిపై పోలీసులు లాఠీచార్జి చేశారు’ అనే శీర్షికతో న్యూస్18 నివేదికను అందించింది. ఈ నివేదికకు సంబంధించిన ఫోటోలో వీడియో నుండి తీసుకున్న స్క్రీన్ షాట్ ఉంది.

నివేదిక ప్రకారం, కర్ణాటకలోని బెళగాంలో ఈ ఘటన చోటు చేసుకుంది. లాక్‌డౌన్ ఆదేశాలు ఉన్నప్పటికీ నమాజ్ చేయడానికి ఒక సమూహం మసీదు వద్ద గుమిగూడినప్పుడు ఈ సంఘటన జరిగింది. సమాచారం అందుకున్న పోలీసులు సంఘటనా స్థలానికి చేరుకుని లాఠీచార్జి చేసి జనాన్ని చెదరగొట్టారు. ఈ వీడియో పాతదని తెలుస్తోంది.

కీవర్డ్ సెర్చ్ చేయగా The Economic Times ఫేస్ బుక్ పేజీలో వీడియోను అప్లోడ్ చేశారు. “Police lathicharge people gathered at Mosque amid lockdown in Belgaum | #CoronavirusLockdown #Live #Updates” అంటూ మార్చి 27, 2020న వీడియోను అప్లోడ్ చేశారు.

అదనంగా.. మార్చి 26, 2020 నాడు Xలో ANI చేసిన పోస్ట్ ను గమనించాం. “బెళగాంలో #Coronaviruslockdownని ఉల్లంఘించినందుకు పోలీసులు ప్రజలను కొట్టారు. ప్రజలు ప్రార్థనలు ముగించుకుని వెళ్లిపోతుండగా మసీదు వెలుపల ఈ ఘటన జరిగింది." అంటూ పోస్టులో తెలిపారు.

#WATCH Police thrash people for violating #Coronaviruslockdown in Belgaum. The incident happened outside a Mosque when people were leaving after offering prayers. #Karnataka pic.twitter.com/tF9Vx4iqV5

— ANI (@ANI) March 26, 2020

అందుకే, నాగపంచమి వేడుకల్లో భాగంగా నాగరబెట్ట పూజ సందర్భంగా ముస్లింలను పోలీసులు కొట్టారన్న వాదన అవాస్తవం. ఈ వీడియో 2020 నాటిది. కోవిడ్-19 లాక్‌డౌన్ ఆంక్షలను పోలీసులు అమలు చేస్తున్న వీడియో ఇది. ఈ ఘటనలో మతపరమైన కోణం లేదు.

Credit : Sibahathulla Sakib