2000 కోట్ల డ్రగ్స్ రాకెట్ లో తమిళ నిర్మాత పేరు

2,000 కోట్ల రూపాయల డ్రగ్స్ రాకెట్ తో సంబంధం ఉన్న తమిళ సినీ నిర్మాత జాఫర్ సాదిక్‌ను ఢిల్లీ పోలీస్ స్పెషల్ సెల్ అండ్ నార్కోటిక్స్ కంట్రోల్ బోర్డ్ (ఎన్‌సిబి) శనివారం అరెస్టు చేసింది. సాదిక్‌ డ్రగ్స్‌ సిండికేట్‌ను నిర్వహిస్తున్నాడని, గత మూడేళ్లుగా వివిధ దేశాలకు 45 సరుకులను పంపాడని, ఇందులో దాదాపు 3,500 కిలోల సూడోపెడ్రిన్‌ ఉన్నట్లు ఎన్‌సిబి తెలిపింది. మాదకద్రవ్యాల అక్రమ రవాణా ద్వారా భారీ మొత్తంలో డబ్బు సంపాదించాడు. సినిమా, నిర్మాణం, హాస్పిటాలిటీ మొదలైన పరిశ్రమల్లో వ్యాపారాల్లో పెట్టుబడి పెట్టానని సాదిక్ ఒప్పుకున్నాడని NCB పేర్కొంది.

అంతర్జాతీయ డ్రగ్ ట్రాఫికింగ్ నెట్‌వర్క్‌ను ఛేదించడానికి నార్కోటిక్స్ కంట్రోల్ బ్యూరో (ఎన్‌సిబి), ఢిల్లీ పోలీసుల స్పెషల్ సెల్ నిర్వహించిన సంయుక్త ఆపరేషన్‌లో భాగంగా ఢిల్లీలో ముగ్గురు వ్యక్తులను అరెస్టు చేశారు. మత్తుపదార్థాలను తయారు చేయడానికి ఉపయోగించే పెద్ద మొత్తంలో రసాయనాలను స్వాధీనం చేసుకున్నారు. ఎన్‌సిబితో పాటు ఢిల్లీ పోలీసులు సాదిక్ కోసం రెండు వారాలుగా వెతుకుతున్నారు. ముగ్గురు నిందితులను ఢిల్లీలో అరెస్టు చేసి వారి వద్ద నుంచి 50 కిలోల సూడోపెడ్రిన్‌ను స్వాధీనం చేసుకున్నారు. హెల్త్ మిక్స్ పౌడర్, డెసికేటెడ్ కొబ్బరి వంటి ఆహార ఉత్పత్తులలో దాచి విమానాలు, షిప్స్ ద్వారా డ్రగ్స్ రవాణా జరిగింది. న్యూజిలాండ్ కస్టమ్స్, ఆస్ట్రేలియన్ పోలీసుల నుండి రెండు దేశాలకు పెద్ద మొత్తంలో సూడోపెడ్రిన్ పంపినట్లు తెలుస్తోంది.